काठमाडौं । नेकपा प्रचण्ड–माधवकुमार नेपाल समूहका स्थायी कमिटी सदस्य अष्टलक्ष्मी शाक्यले सरकारले शान्तिपूर्वक भेला हुने, अधिकारका लागि आन्दोलित हुने मौलिक हक पनि हनन् गर्न लागेको बताएकी छन् ।
आमहड्तालका लागि कलंकी जाँदै गर्दा बाटैबाट पक्राउ परेकी शाक्यलाई अहिले महाराजगञ्ज तालिम केन्द्रमा राखिएको छ ।
“म कलंकी पनि पुगेको थिइनँ । बाटैबाट उठाइयो । शान्तिपूर्वक भेला हुन पाउने अधिकार पनि कटौती भएको हो । केपी ओली नेतृत्वको सत्ताको अत्याचारले सीमा नाघ्यो । अब नेपाली जनता सहँदैनन् । हामीले अति भएर आमहड्ताल गर्नुपरेको हो । यसमा जनताको पूरै साथ छ,” उनले भनिन् ।
तर, सरकार अताल्लिएको उनको प्रतिक्रिया छ । बिहान बाटामा दुईजना पनि उभिन नदिएको र आन्दोलनकारी भन्दै धरपकड सुरु गरेको उनले बताइन् । “अहिले महाराजगञ्ज वृत्तमा ६८ जना राखिएको छ । दुई–तीनजनालाई प्रहरीले कुटपिट गरेको रहेछ । हामीले उहाँहरूलाई उपचार गराउन भनेका छौँ । हामीमध्ये केहीले खाना खायौँ । बाँकी भोकभोकै छन् । सरकारको आतंकको वर्णन गरिसाध्य छैन,” उनले बाह्रखरीसँग भनिन् ।
पक्राउ परेकामध्ये सिनियर नेताहरूलाई प्रहरीले छाड्ने तयारी गरे पनि सबै आन्दोलनकारी मुक्त नभएसम्म वृत्त नछाड्ने उनले बताइन् ।
“हामीलाई जहाँबाट उठाएर ल्याएको हो, त्यहीँ पुर्याउनू भनेका छौँ । भोकै रहेकाहरूलाई खाना, खाजा देऊ भनेका छौँ । घाइतेहरूको उपचार पनि प्रहरीलाई नै गर्न लगाएका छौँ,” उनले भनिन्, “आमहड्ताल प्रतिगमनले निम्त्याएको कदम हो । यसलाई बाध्यताको रूपमा हामीले लिएका छौँ । आज एकदिन कष्ट सहौँ । अब ओलीको सत्ता धेरैदिन लम्बिनेवाला छैन ।”
उनले अहिले प्रहरी कार्यालयभित्र आन्दोलनकारीबीच परिचयात्मक कार्यक्रम, नाराबाजी भइरहेकोसमेत बताइन् । शाक्यले साँझपछि जनजीवन सहज हुने पनि बताइन् ।