काठमाडौं । संयुक्त राष्ट्र संघले दुई अर्ब अमेरिकी डलरको विश्वव्यापी मानवीय सहायता योजना घोषणा गरेको छ । विश्वभर नोभेल कोरोना भाइरसले विश्वका गरिब मुलुकहरु ठूलो संकटमा परेकोले त्यस्ता मुलुकहरुलाई सहयोग गर्न मानवीयता सहायता योजना घोषणा गरेको हो ।
संयुक्त राष्ट्र संघका महासचिव एन्टोनियो गुटेरेसले विश्व स्वास्थ्य संगठन र राष्ट्र संघका अन्य साझेदारहरुको आग्रहमा राष्ट्र संघको मानवीय मामिला समन्वय कार्यालसँगको समन्वयमा यस्तो योजना ल्याइएको बताए ।
"उचित लगानीसहितको यस योजनाले धेरै मानिसहरुको ज्यान बचाउन, मानवतासम्बन्धी काम गर्ने विभिन्न नियोगहरु, प्रयोगशालाका आवश्यक परीक्षण उपकरणहरु, संक्रमितको उपचार गर्ने अन्य आवश्यक चिकित्सा उपकरणहरुका लागि प्रयोग गरिनेछ," गुटेरेसले भने ।
"कोभिड-१९ ले सिंगो मानवतालाई नै खतरामा पारेको छ । त्यसकारण सम्पूर्ण मानव जातीले यसविरुद्ध लड्नुपर्छ । कुनै एक मुलुकको लडाइले मात्र पुग्दैन । बलियो स्वास्थ्य प्रणाली भएका धनी मुलुकहरु पनि कोरोनाको सामना गर्न सकिरहेका छैनन् ।"
गुटेरेसले अहिले मानवता नै संकटमा परेका मुलुकहरुलाई सुरक्षा गर्नपर्ने समय भएको बताए । उनले द्वन्द्वबाट ग्रसित, प्राकृतिक विपत्तिबाट ग्रसित र वातावरणीय परिवर्तनको चपेटामा परेका मुलुहरुको सुरक्षा गर्नुपर्ने भएको छ । "हामीले अति जोखिमा रहेका करोडौं करोड मानिसहरु, जसले आफ्नो सुरक्षा आफैं गर्न सक्दैनन्, उनीहरुको सुरक्षा गर्न लाग्नुपर्दछ," उनले भने ।
"यो मानवीय एक्यबद्धताको आधार हो । भाइरसविरुद्ध लड्न पनि निकै महत्वपूर्ण छ," उनले थपे । -सीएनएन