हङकङ । चीनको वुहान प्रान्तबाट फैलिएको कोरोना भाइरस संक्रमित हङकङमा पनि फेला परेपछि त्यहाँ 'फेस मास्क' को अभाव भएको छ । मास्क अभाव भएपछि त्यसको मूल्य एक्कासि बढेको हो ।
कोरोना भाइरसको संक्रमणबाट बच्न मास्क प्रयोग र मागमा वृद्धि भएपछि व्यवसायीहरुले तेब्बर मूल्यमा मास्क बिक्री गर्न थालेका छन् । शुक्रबार साउथ चाइना मोर्निङ पोस्टले गरेको बजार अनुगमनका क्रममा छमध्ये दुईवटा फार्मेसीमा मास्क अभाव भएको र केहीले २०० हङकङ डलरमा बिक्री गरिरहेको पाएको हो ।
एकजनालाई दुईवटा मास्क बक्सभन्दा बढी नदिनेसमेत गरिएको छ । सहरमा मास्क किन्नेको लामै लाइनसमेत देख्न सकिन्छ । बजारमा मास्कको माग बढेसँगै यसको मूल्य बढाइएको एक महिला मास्क बिक्रेताले बताइन् ।
मास्कको कृत्रिम अभाव सिर्जाना गरेर मूल्यवृद्धि गरेको केही मास्क प्रयोगकर्ताहरुले बताएका छन् । उनीहरुले सरकारले यस्तो विपद्को समयमा बजार अनुगमन गरेर मूल्य निर्धारण गर्न र मागबमोजिम मास्क उपलब्ध गराउन आग्रह गरेका छन् ।
तीन दिने भ्रमणका लागि हङकङ पुगेका इटालीयन पर्यटक कार्लो कोकोले मास्क खरिदका लागि छवटा फार्मेसी धाएर बल्ल पाएको सुनाए । उनले हङकङमा आउनुअघि कोरोनाको संक्रमण फैलिएको बारे आफूलाई जानकारी नभएको बताए ।
कोरोना भाइरसका कारण हङकङमा २६ जनाको मृत्यु भएको छ भने करिब हजारजति संक्रमित छन् । यो भाइरसको संक्रमण अमेरिका, जापान, दक्षिण कोरिया, थाइल्याण्ड पनि देखिएको छ ।
शुक्रबार नेपालको स्वास्थ्य मन्त्रालयले पनि एकजना चीनबाट फर्किएका नेपाली विद्यार्थीमा कोरोनाको संक्रमण भएको पुष्टि गरेको हो ।
