काठमाडौं । नेपाली इन्जिनियरहरुको छाता संगठन नेपाल इन्जिनियर्स एसोसिएसनले ५६ वर्ष पूरा गरी ५७ वर्षमा प्रवेश गरेको छ । एशोसिएसनले हरेक वर्ष साउन ३ गतेलाई “इन्जिनियर दिवस” को रुपमा विभिन्न कार्यक्रमहरुसहित मनाउँदै आएको छ । यो वर्ष प्रधानमन्त्री  केपी शर्मा ओलीले उक्त दिवस उद्घाटन गर्ने कार्यक्रम रहेको एसोसिएनले शुक्रबार रिपोर्टर्स क्लब नेपालमा पत्रकार सम्मेलन गरी जानकारी गराएको हो । 

कार्यक्रममा एशोसिएसनका अध्यक्ष ई. त्रिरत्न बज्राचार्यले अहिले विश्वको लागि ज्ञान नै ठूलो पुँजी भएको भन्दै चीन, सिंगापुरजस्ता विकसित राष्ट्रमा ईन्जिनियरहरुले देश हाँकेको सुनाए । उनले यो वर्षको इन्जिनियर दिवसका अवसरमा आयोजित विभिन्न सत्रहरुबाट आएका सुझावहरुलाई एकीकृत गरेर सरकारलाई बुझाउने पनि स्पष्ट पारे । एसोसिएसनमा अहिले ५२ हजार इन्जिनियर दर्ता भएको बताए ।