मस्को । अमेरिकी विदेशमन्त्री माइक पम्पेओले आफ्नो देशले इरानसँग युद्ध नचाहेको बताएका छन् । दुई देशबीच केही समययता तनावपूर्ण वातावरण सिर्जना भइरहेको बेलामा रुस भ्रमणमा गएका पम्पेओले सो कुरा बताएका हुन् ।
उनले इरानप्रति अमेरिकाले एक सामान्य देश जस्तै व्यवहार गर्न अमेरिकाले चाहेको समेत बताएका छन् । उनले यदी अमेरिकी हितमा आक्रमण भएमा अमेरिकाले जवाफ दिने समेत बताएका छन् । यसैबीच इरानमा सर्वोच्च नेता अयातुल्लाह खोमेनीले पनि अमेरिकाका साथ कुनै युद्ध नहुने बताएका छन् ।
गएको साता अमेरिकाको जंगी जहाजी बेडा र युद्धपोत मध्यपूर्वमा तैनाथ गरेपछि आशंकाको रुपमा हेरिँदै आएको थियो । संयुक्त अरब इमिरेट्स (यूएई)मा चारवटा पानी जहाजमा आक्रमणको प्रयास गरिएको कुराले गर्दा झन् तनावको अवस्था उत्पन्न भएको थियो । सो घटनालाई अमेरिकाले इरानको गतिविधि भनेपनि त्यसको प्रमाण भने मिलेको थिएन । इरानले सो घटनामा आफ्नो हात नभएको जनाउँदै जाँचको माग गरेको थियो ।
मादुरोलाई समर्थन नगर्न र राष्ट्रपति चुनावमा हस्तक्षेप नगर्न रुसलाई आग्रह
रुस भ्रमणका क्रममा अमेरिकी विदेशमन्त्री पम्पेओले रुसी विदेशमन्त्री सर्गेई लावरोफसँग वार्ता समेत गरेका थिए । सो अवसरमा उनले भेनेजुएलाका राष्ट्रपति निकोलस मादुरोको समर्थन नगर्न समेत आग्रह गरेका थिए । तर, रुसी विदेशमन्त्रीले सो कुरा अस्वीकार गरेका थिए । अमेरिकी विदेशमन्त्रीले सन् २०२०मा अमेरिकामा हुन लागेको राष्ट्रपति निर्वाचनमा हस्तक्षेप नगर्न समेत आग्रह गरेका थिए ।
सो अवसरमा रुसी विदेशमन्त्रीले अमेरिकी चुनावमा रुसी हस्तक्षेपको हल्ला अब समाप्त हुने बताएका थिए । (बीबीसीबाट)