काठमाडौं । सरकारले कान्ति बाल अस्पतालका लागि ५ करोड आर्थिक सहयोग गर्नेे भएको छ । आइतबार अस्पतालको ५७ औं वार्षिकोत्सव कार्यक्रममा स्वास्थ्य तथा जनसंख्या राज्यमन्त्री डा. सुरेन्द्रकुमार यादवले कान्ति बाल अस्पतालमा ब्लड क्यान्सरको उपचारका लागि आवश्यक व्यवस्था गर्न ५ करोड आर्थिक सहयोग गर्ने बताएका हुन् । 

“कान्ति लगायतका देशैभरका सरकारी अस्पतालहरुको स्तरोन्नतिका लागि सरकारले आवश्यक बजेटको व्यवस्था गर्ने नीति लिएको छ,” उनले भने, “स्वास्थ्य सेवालाई सहज बनाउने संवैधानिक व्यवस्था भएपनि बजेट र जनशक्तिको अभावमा ती कामहरु तत्काल गर्न सक्ने अवस्था छैन ।”

अस्पतालमा बाल स्वास्थ्यका सबै विशिष्टिकृत सेवाहरुको स्थापना गर्ने र बाल स्वास्थ्य सम्बन्धी अध्ययनसँगै राष्ट्रिय अनुसन्धान केन्द्रसहितको बाल स्वास्थ्य अध्ययन प्रतिष्ठानको रुपमा विकास गर्ने सरकारको लक्ष्य रहेको स्वास्थ्य तथा जनसंख्या राज्यमन्त्री यादवले बताए । 

अस्पतालका निर्देशक डा.गणेशकुमार राईले अस्पतालको विकासमा सरकारले पूर्ण साथ पाउने विश्वास रहेको बताए ।