काठमाडौं । टेबलटेनिस खेलाडी एरिका महर्जन उच्च शिक्षाका लागि शुक्रबार अस्ट्रेलियाको मेलबर्न जाँदैछिन् । पाँचौं वरियताकी एरिकालाई काठमाडौं जिल्ला टेबलटेनिस संघले लैनचौरस्थित राष्ट्रिय टेबलटेनिस प्रशिक्षण केन्द्रमा आयोजित एक कार्यक्रमबीच बिहीबार बिदाइ गर्यो ।

अन्तर्राष्ट्रिय प्रतियोगिताका रुपमा एरिकासँग २०१५ मा थाइल्यान्डमा भएको एसियाली टेबलटेनिस प्रतियोगिता र भारतमा यसै वर्ष सम्पन्न १२ औं दक्षिण एसियाली खेलकुद (साग) खेलेको अनुभव छ । १० वर्ष निरन्तर टेबलटेनिस खेलेकी एरिकाले पाकिस्तान, भारत र बंगालादेशमा भएको दक्षिण एसियाली जुनियर टेबलटेनिस प्रतियोगिताको तीन फरक संस्करणमा कांस्य जितेकी थिइन् । एरिकाका दाजु राकेश, भाउजु नविता श्रेष्ठ (पाँच पटककी राष्ट्रिय च्याम्पियन) र दिदी एलिना (दोश्रो वरियता) पनि टेबलटेनिस खेलाडी हुन् । 

जिल्ला अध्यक्षसमेत रहेका अखिल नेपाल टेबलटेनिस संघका उपाध्यक्ष धर्ममान वज्राचार्य, केन्द्रीय सचिव एवं टेबलटेनिस मुख्य प्रशिक्षक शंकर गौतम, केन्द्रीय सदस्य एवं पूर्व खेलाडी सन्ध्या शाक्य, टेबलटेनिस पूर्व मुख्य प्रशिक्षक रमेशराज जोशी, सिनियर÷जुनियर खेलाडी, प्रशिक्षकलगायतले एरिकालाई सफलताको शुभकामना दिदै बिदाइ गरे । एरिका नयाँबजारस्थित प्राइम कलेजमा बीबीएस तेस्रो वर्षमा अध्ययनरत थिइन् ।