काठमाडौं । यतिबेला सबैको ध्यान फागुन २० गतेदेखि जिम्बावेमा सुरु भएको आईसीसी विश्वकप छनोट क्रिकेटमा छ । नेपाल पहिलो खेलमा पराजित भएसँगै सुपर सिक्समा पुग्छ कि पुग्दैन भन्ने निकै चासोको विषय बनेको छ । 

आईसीसी विश्वकप छनोटको आफ्नो पहिलो खेलमा नेपाल आयोजक जिम्बावेसँग ११६ रनले पराजित भएसँगै विभिन्न आँकडाहरू निकाल्न थालिएको छ । के अब नेपाल सुपर सिक्समा पुग्छ ? त्यसो त नेपाल सुपर सिक्समा पुग्ने र एक दिवसीय मान्यता पाउने उद्देश्यसहित जिम्बावे प्रस्थान गरेको थियो । 

आईसीसी विश्व क्रिकेट लिग डिभिजन टु मा राम्रो प्रदर्शन गर्दै विश्वकप छनोटमा प्रवेश गरेको नेपाल सबैभन्दा कमजोर मानिएको टिम हो । किनभने नेपालले डिभिजन टु बाट उपविजेता बन्दै यहाँसम्मको यात्रा पार गरेको हो भने विभिन्न समस्याले गुज्रिएको टिम हो, नेपाल । 

उद्देश्य ठूलो तर कठिन यात्रा पार गर्दै गरेको नेपाली क्रिकेट अफ्रिकन राष्ट्र जिम्बावेमा नेपाली झण्डा फरफराउन आतुर छन् तर उद्देश्यमा पुग्न निकै चुनौतीहरूको पार गर्नुपर्ने हुन्छ ।

सम्मानजनक हार
इतिहास रच्ने दाउमा रहेको नेपाल पहिलो खेलमा जिम्बावेसँग ११६ रनले पराजित भयो । यद्यपि नेपाली क्रिकेट इतिहासमा पहिलो पटक टेष्ट राष्ट्रसँग नेपालको यो सम्मानजनक हार हो ।
जिम्बावेले टस जितेर पहिले ब्याटिङ गर्ने निर्णय गर्दै निर्धारित ५० ओभरमा ६ विकेट गुमाएर ३८० रनको विशाल योगफल तयार पार्यो । सोमपाल कामीले पहिलो बलमा नै छक्का प्रहार गरे । जिम्बावेका खेलाडीले दोस्रो ओभरमा कप्तान पारस खड्काको बलिङमा १६ रन ल्याएपछि नेपाली बलर डगमगाएका थिए । सुरुवातमै आत्तिएका नेपाली बलरमाथि जिम्बावेका ब्याट्सम्यान निकै आक्रमक बने । 

जिम्बावेका मिडिल अर्डर ब्याट्सम्यान सिकन्दर राजाले शतकसहित १२३ र ब्रेन्डन टायलरले १०० रनको शतकीय पारी खेलेपछि नेपालले ३८१ रनको ठूलो चुनौती पाएको थियो ।
पछिल्लो प्रदर्शनलाई हेर्दा निकै फितलो देखिने नेपाली ब्याटिङसामु यो स्कोर सगरमाथाको उचाइभन्दा उच्च थियो । जवाफी ब्याटिङ थालेको नेपालको ९ रन हुँदा पहिलो विकेटको रुपमा दिलिप नाथ आउट भएपछि नेपाली इनिङ्स खराब हुने आशंकाहरु पैदा भएका थिए । तर, नेपालले जिम्बावेमाथि राम्रो रन बनाउँदै सम्मानजनक हार ब्यहोरेको छ ।

नेपालले निर्धारित ५० ओभरमा ८ विकेटको क्षतिमा २६४ रन बनाउन सफल भयो । यो स्कोरले नेपालको ब्याटिङ सुधारिएको अपेक्षा गरिएको छ । जिम्बावेविरुद्ध नेपालका २ खेलाडीले अर्धशतक बनाए । शरद भेषवाकरले ५२ र आरिफ शेखले ५० रन बनाउँदै अर्धशतक बनाएका थिए । त्यस्तै, नेपालका लागि कप्तान पारसले ४०, ज्ञानेन्द्र मल्लले ३२ र रोहित कुमार पौडेलले ३० रन बनाए ।

३ खेलमा २ जित्नैपर्ने
पराजित भएसँगै नेपालको नेट रनरेट –२.३२० रहेको छ । आइतबार नै भएको खेलमा आफगानिस्तानलाई पराजित गरेको स्कटल्याण्डको ०.३०८ नेट रनरेट रहेको छ । अहिले समूह बी को पुछारमा नेपाल रहेको छ । तर सम्भावना भने सकिएको छैन । 

समूह बीमा नेपालभन्दा सबै राष्ट्र अब्बल छन् । जिम्बावे र अफगानिस्तान टेष्ट नेशन राष्ट्र हुन् भने स्कटल्याण्ड र हङकङ एक दिवसीय मान्यता प्राप्त राष्ट्र हुन् । त्यसकारण पनि नेपाल कमजोर मानिएको हो । 

सुपर सिक्समा पुग्नका लागि नेपालले कम्तिमा पनि दुई खेल जित्नैपर्ने हुन्छ । अब नेपालले समूह चरणको आफ्नो दोस्रो खेलमा फागुन २४ गते बिहीबार स्कटल्याण्डसँग खेल्दैछ । त्यस्तै, दोस्रो खेलमा नेपालले २६ गते अफगानिस्तानसँग खेल्दैछ । समूह चरणको आफ्नो अन्तिम खेलमा नेपालले हङकङसँग फागुन २८ गते सोमबार प्रतिस्पर्धा गर्दैछ । 

नेपालले खेल्ने अबको ३ खेलमध्ये २ खेलमा जित हात पारे सुपर सिक्समा पुग्न सक्छ । २ खेलमा जित हात पारेर मात्रै हुँदैन, नेपालले नेट रनरेट पनि सुधार गर्नुपर्ने हुन्छ । समूह ए र बीको शीर्ष ३ मा पर्ने राष्ट्रले सुपर सिक्समा स्थान बनाउने छन् ।

सुपर सिक्समा पुगे नेपालले थुप्रै अवसरहरू प्राप्त गर्नेछ । नेपालको आगामी भविष्य यही प्रतियोगिताले तय गर्ने हुँदा नेपालको लागि यो विश्वकप भन्दा कम छैन ।

जिम्बावे जानुअघि कप्तान पारसले भनेका थिए, “हाम्रो पहिलो लक्ष्य भनेको सुपर सिक्स पुग्ने हो । त्यसपछि हामी विश्वकपको सपना देख्न सक्छौं । त्यति सजिलो भने छैन । २ वटा राष्ट्रमात्रै विश्वकपमा छनोट हुने भएकाले कतिपय राष्ट्रले करिब २ वर्षदेखि नै अभ्यास थालेका छन् । अहिलेको लागि भनेको एक दिवसीय मान्यता पाउने र सुपर सिक्समा पुग्ने नै हो ।”