चितवन । चितवनको हस्पिटलरोडस्थित भरतपुर सामुदायिक अस्पतालमा ढाडको उपचार गराइरहेका एक बिरामीको मृत्यु भएपछि तनाव उत्पन्न भएको छ ।
ढाडको अपरेशन गरेका रत्ननगर–१५, माधवपुरका ४५ वर्षीय सोमबहादुर तामाङको उपचारको क्रममा सोमबार दिउँसो मृत्यु भएपछि उनका आफन्तले अस्पताल बाहिर विरोधमा उत्रिएका हुन् ।
बिरामी मृत्युपश्चात् तनाव भएपछि अहिले अस्पताललाई प्रहरीले सुरक्षा दिइरहेको छ । अस्पतालका चिकित्सक डा. कृष्ण पौडेलले सो बिरामीको हृदयाघातबाट निधन भएको जनाएका छन् ।
तर, मृतकका आफन्तले अस्पतालको लापरबाहीका कारण बिरामीको ज्यान गएको भन्दै चिकित्सकलाई कारबाही हुनुपर्ने माग गरेका छन् । फागुन ११ गते ढाडको अप्रेशन गरेका तामाङ सोमबार दिउँसो २ बजेसम्म आफन्तसँग कुराकानी गरिरहेका थिए । उनी अस्पतालको शौचालयमा लडेर हृदयाघात भएको अस्पतालको दाबी छ ।
तामाङको अप्रेशन हाडजोर्नी तथा नशारोग विषेशज्ञ डा. कृष्णप्रसाद पौडेललगायतको टिमले गरेको थियो । डा. पौडेलले मधुमेहका रोगीसमेत रहेका तामाङको हृदयाघात भएर मृत्यु भएको बताए । अस्पतालले सोमबार बेलुकी तामाङको मृत्यु भएको आफन्तलाई जानकारी गराएको थियो ।
अस्पताल परिसरमा उनका आफन्तहरु रोइकराइ गर्दै अस्पतालकै लापरबाहीबाट बिरामीको मृत्यु भएको भन्दै कारबाही गरिनुपर्ने माग गरेका छन् । यस सम्बन्धमा पीडित पक्ष र अस्पताल प्रशासनबीच वार्ता भइरहेको छ ।
चितवनमा निजी अस्पतालमा जथाभावी उपचार गर्दा बिरामीको मृत्यु हुने गरेको भन्दै स्थानीय आक्रोशित छन् । केही साताअघि भरतपुरकै नेशनल सिटी अस्पतालमा एक बिरामीको उपचारको क्रममा मृत्यु भएपछि अस्पतालले करिब ६ लाख रुपैयाँ क्षतिपूर्ति दिएर तनाव हल गरेको थियो ।
