काठमाडौं । नेपाल बार एसोसिएसन केन्द्रीय कार्यसमितिको निर्वाचनको मत गणना जारी छ । प्राप्त पछिल्लो मत परिणामअनुसार अध्यक्षका उमेदवार डा. विजयप्रसाद मिश्र निकटतम प्रतिद्वन्द्वी रमनकुमार श्रेष्ठभन्दा दोब्बर मतले अगाडि छन् । 

हालसम्म डा. मिश्रले २६४३ मत ल्याउँदा श्रेष्ठले जम्मा १३११ मत पाएका छन् । अध्यक्ष पदका अन्य उम्मेदवारमध्ये राजु कैतीले १३ मत, उज्वलकुमार घिमिरेले ९ मत र आशिष पौडेलले २४ मत पाएका छन् । 

कोसी प्रदेश उपाध्यक्ष पदमप्रसाद लिम्बूले दुई हजार ९८ मत ल्याएका छन् भने उनका निकटतम प्रतिद्वन्द्वी प्रत्यासी कर्णबहादुर राईले एक् हजार २१ मत पाएका छन् ।

मधेस प्रदेश उपाध्यक्षमा अजयशंकर झाले दुई हजार ८०० मत ल्याउँदा उनका निकटतम प्रतिद्वन्द्वी प्रमोद प्रसादले एक हजार चार मत पाएक छन् । वाग्मती प्रदेश उपाध्यक्षमा तेजबहादुर रावलले दुई हजार ७२७ मत ल्याउँदा निकटतम प्रतिद्वन्द्वी डकेन्द्रप्रसाद सुवेदीले एक हजार १२५ मत पाएका छन् ।

गण्डकी प्रदेश उपाध्यक्षमा भूपेन्द्र खनालले दुई हजार ६४३ मत ल्याउँदा सुकदेव गौतमले एक हजार १८९ मत पाएका छन् । यस्तै, लुम्बिनी प्रदेश उपाध्यक्षमा कृष्णप्रसाद पोख्रेलले दुई हजार ७६१ मत ल्याउँदा निकटतम प्रतिद्वन्द्वी तीर्थराज ज्ञवालीले एक हजार ५१ मत पाएका छन् । 

कर्णाली प्रदेश उपाध्यक्षमा विवशकुमार बस्नेतले दुई हजार ७७० मत ल्याउँदा धर्मराज न्यौपानेले एक हजार २५ मत पाएका छन् । सुदूरपश्चिम उपाध्यक्षमा सिद्धराज ओझाले दुई हजार ७७६ मत पाउँदा पदमराज शर्माले एक हजार १३ मत ल्याएका छन् । महिला उपाध्यक्षमा सरस्वती श्रेष्ठले दुई हजार ५२२ मत ल्याउँदा दिना श्रेष्ठले एक हजार २६७ मत पाएकी छन् ।

महासचिवमा विजयप्रसाद प्यानलका केदारप्रसाद कोइरालाले अग्रता बनाएका छन् । उनले दुई हजार ६२२ मत ल्याउँदा निकटतम प्रतिद्वन्द्वी यज्ञमणि न्यौपानेले एक हजार १२८ मत पाएका छन् । अर्का उमेदवार हरिशरण कार्की ९१ मतमा सीमित भएका छन् ।

कोषाध्यक्ष उमेदवार जगतबहादुर कार्कीले दुई हजार ४३ मत पाएका छन् । निकटतम प्रतिद्वन्द्वी दीपक राईले ९२० मत ल्याएका छन् । कोषाध्यक्षका अर्का उमेदवार विष्णुप्रसाद सापकोटाले १३६ मत पाएका छन् ।