काठमाडौं । नेपाली कांग्रेसका महामन्त्री गगन थापाले सरकारले शासकीय सुधार र आर्थिक सुधारमा जोखिम उठाउनुपर्ने बताएका छन् ।

शनिबार बाह्रखरी मिडियाले आयोजना गरेको ‘एनसेल बाह्रखरी गल्फ तथा आर्थिक परिसंवाद’मा सरकारले सुधारका निर्णय गर्दा पात्र छनोटमा ध्यान दिनुपर्ने आवश्यकता औंल्याए ।

संख्याको हिसाबले सरकार बलियो नहुने उनको भनाइ छ । “एकदमै बलियो सरकार बन्यो भनिरहेका छौँ । प्रत्येक सरकार बलियो हुन्छ । दुईतिहाइ संख्याको हिसाबले बलियो हुने भए योभन्दा अघिको सरकार बलियो थियो,” उनी भन्छन् ।

सरकारले उठाउने जोखिमले बलियो कि कमजोर भन्ने देखाउने उनको भनाइ छ । “यो सरकारले केही जोखिम उठाउँछ कि उठाउँदैन । जोखिम उठाए बलियो हो । नउठाए लुते हो,” उनी भन्छन् ।

थापाले शासकीय र आर्थिक सुधारका लागि कानुन नयाँ बनाउने मात्रै नभएर केही खारेज समेत गर्नुपर्ने बताए ।