काठमाडौं । राजसंस्था र हिन्दु राज्य पुनर्स्थापनानिम्ति आन्दोलनका नाममा अराजकता मच्चाएर भागेका विवादित मेडिकल व्यवसायी दुर्गा प्रसाईं अझै फरार छन् । शुक्रबार (चैत १५) राजावादीले काठमाडौंको तीनकुनेमा गरेको प्रदर्शन हिंसात्मक बन्दा दुईजनाको मृत्यु भएको थियो । पत्रकार सुरेश रजक र कीर्तिपुरका सविन महर्जनको मृत्यु भएको हो ।

प्रसाईं ‘जनआन्दोलन’ नाम दिएको प्रदर्शनका ‘कमान्डर’ तोकिएका थिए । प्रदर्शनका संयोजनक भने पूर्वमहापञ्च ८६ वर्षीय नवराज सुवेदी तोकिएका थिए । प्रदर्शन अराजक बनेपछि सुवेदी घरमै नजरबन्दमा छन् ।

शुक्रबारदेखि उनीहरूले निरन्तर राजासंस्थाका पक्षमा काठमाडौंमा प्रदर्शन गर्ने बताएका थिए । तर, ‘कमान्डर’ प्रसाईं फरार भए । प्रदर्शनमा सहभागी राष्ट्रिय प्रजातन्त्र पार्टी (राप्रपा)का वरिष्ठ उपाध्यक्ष रवीन्द्र मिश्र, महामन्त्री धवलशमशेर राणा, अधिवक्ता स्वागत नेपाललगायत व्यक्तिहरूलाई प्रहरीले पक्राउ गरेको छ ।

उनीहरूमाथि के मुद्दा लगाउने भन्नेबारे प्रहरी गृहकार्यमा छ । मिश्र, राणा र नेपालसहित अराजक प्रदर्शन, तोडफोड, आगजनी र लुटपाट गर्ने १११ जनालाई प्रहरीले थुनामा राखी अनुसन्धान गर्न म्याद थपका निम्ति अदालतमा उपस्थित गराउने तयारी गरेको छ । प्रसार्ईंको खोजीमा प्रहरी शुक्रबार रातिदेखि नै लागेको छ ।

नेपाल प्रहरीको उपत्यका अपराध अनुसन्धान कार्यालयका तीन जिल्लाका विशेष टोली, प्रहरी प्रधान कार्यालयको विशेष ब्युरोको टोली र केन्द्रीय अनुसन्धान ब्युरो (सीआईबी)को टोली समेत शनिबारदेखि प्रसार्इंको खोजीमा सक्रिय छन् । तर, प्रहरीले उनको सुइँको पाउन सकेको छैन ।

प्रसाईंका गुरु पुस्कर खतिवडालाई जिल्ला प्रहरी परिसर ललितपुर र विशेष ब्युरोको संयुक्त टोलीले शनिबार पक्राउ गरेको छ । उनी ललितपुरको इमाडोलबाट ट्याक्सीमा भाग्दै गर्दा पक्राउ परेका थिए । उनलाई भेट्न प्रसाईं समेत शनिबार बिहान खतिवडाको घर पुगेको प्रहरीले जनाएको छ ।

खतिवडाको घरमा फलफूल खाएर हिँडेका प्रसाईं कहाँ गए भन्नेबारे प्रहरीले कुनै सूचना पाएको छैन । प्रसाईंले चलाउँदै आएको मोबाइलको अन्तिम ‘लोकसन’ ललितपुरकै भैँसेपाटीमा देखिएको प्रहरीले जनाएको छ ।

प्रदर्शन अराजक बनाउने शाही युवा शक्ति नेपालका अध्यक्ष पशुपति खड्कालाई भने प्रहरीले पक्राउ गरिसकेको छ ।

प्रसाईंका सहयोगी सन्तोष ‘राजावादी’ पनि फरार छन् । तीनकुने प्रदर्शनक्रममा सुरुमा निषेधित क्षेत्र तोड्न खोज्ने समूहका नाइके समेत सन्तोष राजावादी हुन् ।

कहाँ गए प्रसाईं ?
प्रसाईं कहाँ गए भन्ने भेउ समेत प्रहरीले पाएको छैन । खतिवडाले प्रसाईं शनिबार बिहान आफ्नो घरमा करिब एक घण्टा बसेर निस्किएको प्रहरीसमक्ष बताएका छन् । खतिवडाको घरबाट निस्कँदा प्रसाईंले काठमाडौं छाड्ने बताएका थिए ।

खतिवडाले प्रहरीसित भनेका छन्, ‘‘मेरो घरमा दुर्गा प्रसाईं करिब बिहान एक घण्टा बस्नुभएको थियो । फलफूल र एक गिलास दूध पनि खानुभयो । त्यहाँबाट स्कोरपियो गाडीमा निस्केर काठमाडौं छाड्ने कुरा गर्नुभएको थियो । त्यसपछि कता जानुभयो थाहा छैन ।’’

प्रसाईसँग अरू पाँचजना समेत साथमै रहेको खुलेको छ । तर, खतिवडाले आफ्नो घरको सीसीटीभी फुटेजको ‘हार्डड्राइभ’ गायब पारेको प्रहरीले जनाएको छ ।

प्रसाईंलाई पक्राउ गर्न हम्मेहम्मे पर्नुका पछाडि उनको निकट टिममा पूर्वसैनिक कर्मचारी र अवकाशप्राप्त प्रहरी समेत रहनुलाई सुरक्षा निकायले कारण मानेको छ ।

सुरक्षा ‘थ्रेट’बारे प्रसाईंले उनीहरूसित सल्लाह लिने गरेका थिए । अनुसन्धानमा खटिएका प्रहरीका अनुसार, प्रसाईंले चढ्ने गरेका करिब १५ गाडी र उनीनिकट सबै व्यक्तिमाथि सोधपुछ तीव्र पारिएको छ । प्रहरी उच्च स्रोतका अनुसार, प्रसाईंको खोजीमा प्रहरीको विशेष ब्युरोका एसएसपी सन्तोष खड्का ‘फिल्ड’मा खटिएका छन् ।

यस्तै, ललितपुर प्रहरीबाट एसपी नरहरि रेग्मीको टोली परिचालन गरिएको छ । उपत्यका अपराध अनुसन्धान कार्यालयबाट एसपी अंगुर जिसीको ‘कमान्ड’मा टोली सक्रिय छ । तर, उनलाई पक्राउ गर्न हालसम्म सबै टोली असफल छन् ।

यसैबीच, प्रसाईंले आफू काठमाडौंमै रहेको जिकिरसहित आइतबार (चैत १७) एक भिडियो सार्वजनिक गरेका छन् ।

• दुर्गा प्रसाईंले भने– काठमाडौंको एक मन्दिरमा सुरक्षित छु