काठमाडौं । प्रहरी प्रधान कार्यालयले प्रहरीको प्राविधिक समूहतर्फ नयाँ भर्ना आह्वान गरेको छ । नेपाल प्रहरीमा प्राविधिक प्रहरी समूहअन्तर्गत विभिन्न उपसमूहतर्फ रिक्त दरबन्दी भर्नाका लागि दरखास्त आह्वान गरिएको हो ।

जसमा प्राविधिक प्रहरी निरीक्षक, प्रहरी नायव निरीक्षक र प्रहरी सहायक निरीक्षक पदमा खुला प्रतियोगिताबाट समावेशी प्रावधानबमोजिम पदपूर्ति गर्न लागिएको हो । विभिन्न पदका लागि १०४ जना मागिएको छ ।

जसमध्ये इन्जिनियरिङतर्फ प्राविधिक प्रहरी निरीक्षक पदका लागि ११ जना र प्राविधिक प्रहरी सहायक निरीक्षक पदका लागि ४५ जना, स्वास्थ्यतर्फ प्राविधिक प्रहरी निरीक्षक पदका लागि २२ जना, प्राविधिक प्रहरी नायव निरीक्षक पदका लागि १५ जनाको माग गरिएको छ ।

यसरी नै प्राविधिक प्रहरी सहायक निरीक्षक पदका लागि आठजना, केनाईनतर्फ प्राविधिक प्रहरी निरीक्षक पदका लागि एकजना र प्राविधिक प्रहरी सहायक निरीक्षक पदका लागि एकजना तथा हातहतियारतर्फ प्राविधिक प्रहरी निरीक्षक पदका लागि एकजना नयाँ भर्नाका लागि दरखास्त आह्वान गरिएको हो ।

दरखास्त दिने उमेदवारहरूले नेपाल प्रहरीको सातवटै प्रदेश प्रहरी कार्यालयमा अनलाइन दरखास्त संकलन तथा दर्ता गर्न सक्नेछन् । चैत १८ गतेदेखि ०८२ वैशाख १६ गतेसम्म अनलाइन प्रणालीमार्फत कार्यालय समयभित्र दरखास्त फारम बुझाउन सकिनेछ ।