काठमाडौं । चलचित्र ‘वसन्त’ले समाजका विभिन्न पक्षलाई उठान गर्ने यसका सर्जक तथा कलाकारले बताएका छन् । 

जातिय विभेद, छुवाछुत, आर्थिक असमानता, प्रेम, विश्वास, शान्तिजस्ता विषयलाई ‘वसन्त’ले उठान गरेको निर्देशक समेत रहेका कलाकार प्रकाश सपूतले बताएका छन् । 
 
पात्रको नाम अनुसारको विषय चलचित्रले उठान गरेको उनले बताए । “शान्ति, सपना, प्रेम, सत्य हाम्रो चलचित्रका मुख्य पात्र हुन् । हाम्रो समाज, भुगोल हाम्रो जीवन र समग्र विश्व नै यसकै वरिपरि घुमेको छ,” प्रकाश भन्छन्, “यही विषयलाई हाम्रो चलचित्रले उठान गरेको छ । जात र छुवाछुतको विषय मात्रै उठान गरेको छ ।”

चलचित्रमा लैंगिक, बर्गीय र भौगोलिक विभेद, गरिबी, असमानता, वैदेशिक रोगजार, प्रेम, एउटै समाजबीच रहेका ससना कुराले सिर्जना गर्ने टकराबलाई देखाएको प्रकाशले बताएका छन् ।  

‘वसन्त’की नायिका स्वस्तिमा खड्काले प्रकाशले चलचित्रमार्फत समाजलाई धेरै प्रश्न गरेको बताएकी छन् । राजनीति र नेतालाई प्रकाशले प्रश्न गरेको उनले बताएकी छन् । 

‘वसन्त’ चैत २२ गते रिलिज हुनेछ । प्रकाशको डेब्यु निर्देशन रहेको चलचित्रमा प्रकाश र स्वस्तिमासँगै प्रभात पाल ठकुरी, श्री शिभान्सी, उर्मिला लाम्गादे, खड्कबहादुर पुन, अनुप बराल, कमलमणि नेपाल, प्रकाश घिमिरे, विशाल पहारीलगायत कलाकारको अभिनय रहेको छ ।

सोसल ड्रामा ‘वसन्त’मा कथा, पटकथा र संगीत पनि निर्देशक प्रकाशकै रहेको छ । 

विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने संघर्षको कथा ‘वसन्त’ले भन्ने निर्माणपक्षले जनाएको छ । 

चलचित्रको निर्मातामा मोहन विश्वकर्मा र बिन्दु बोहोरा तथा कार्यकारी निर्मातामा अनुरोध भट्टराई, नाना थकाली र वीरेन्द्र नारायण श्रेष्ठ छन् ।