काठमाडौं । नेपाली कांग्रेसका सभापति एवं पूर्वप्रधानमन्त्री शेरबहादुर देउवाले काठमाडौंमा आइतबार भएको राजावादीहरूको प्रदर्शन कुनै अद्भुत नभएको बताएका छन् । सोमबार धनगढी विमानस्थलमा सञ्चारकर्मीहरूसँग कुरा गर्दै सो प्रतिक्रिया दिएका हुन् ।

उनले केही नभएको भन्दै आत्तिनुपर्ने कारण नरहेको उल्लेख गरे । पूर्वराजा ज्ञानेन्द्र शाहलाई भारतले उचालेको हो भन्ने प्रश्नमा उनले कसैले उचाल्ने कुरा नभएको र उचालेको थाहा नरहेको बताए ।

सभापति देउवाले दुई ठूला राजनीतिक दलहरूको सरकार अहिले रहेको र यो ०८४ सम्मै चल्ने दाबी गरे । "कहाँ अद्भुत भएको छ, केही भएकै छैन । समसामयिक अवस्था ठिक छ । दुई वटा ठूला पार्टी सरकारमा छन् । राम्रोसँग चलेको छ । सरकारमा कुनै समस्या छैन, ०८४ सम्मै जान्छ । हामी भोट पाएको मान्छे हो," देउवाले भने ।