काठमाडौं । देशका केही स्थानमा शनिबार (फागुन २४) वर्षा र हिमपात भएको छ । पश्चिमी न्यूनचापीय प्रणालीको आंशिक प्रभावले काठमाडौंसहित झापा, मोरङ, संखुवासभा, मनाङ, कास्की, गोरखा, रुकुम पश्चिम, सिन्धुपाल्चोकमा वर्षा भएको जल तथा मौसम विज्ञान विभागले जनाएको छ ।

यी जिल्लाका केही स्थानमा हल्कादेखि मध्यम वर्षा र उच्च पहाडी तथा हिमाली भूभागमा हिमपात समेत भएको छ । काठमाडौंमा छिटपुटदेखि हल्का वर्षा भएको विभागअन्तर्गतको मौसम पूर्वानुमान महाशाखाले जनाएको छ ।

यसको प्रभाव शनिबार रातिदेखि विस्तारै कम हुने महाशाखाका मौसमविद् सरोज पुडासैनीले बताए । तर, आइतबार (फागुन २५) कोसी, वाग्मती र गण्डकी प्रदेशमा बदली (आकाशमा बादल)को सम्भावना रहेको उनले जानकारी दिए ।

कोसी र गण्डकीका एक/दुई स्थानमा वर्षा र हिमपातको पनि सम्भावना छ । तर, मजबुत सम्भावना नरहेको उनले स्पष्ट पारे । “वर्षा र हिमपातको सम्भावना भोलि (आइतबार)लाई कमै छ,” उनले बाह्रखरीसित भने ।

आइतबार काठमाडौंमा पनि बदली हुने महाशाखाको पूर्वानुमान छ । आकाशमा बादल लाग्ने उनको भनाइ छ ।

“काठमाडौंमा आंशिकदेखि साधारणतया बदली हुने देखिन्छ । आज (शनिबार)को जस्तैजस्तै हुन्छ,” उनले भने, “काठमाडौंमा भोलि वर्षाको सम्भावना खासै देखिएको छैन ।”

भित्रँदै छ अर्को प्रणाली
पानी पार्ने पश्चिमी वायुकै अर्को प्रणाली भित्रन लागेको छ । आउँदो सोमबार (फागुन २६) त्यो प्रणाली नेपाल भित्रने मौसमविद्ले बताएका छन् ।

तर, त्यो ठूलो ‘सिस्टम’ नहुने र धेरै क्षेत्रमा प्रभाव नपर्ने मौसमविद् पुडासैनीले बताए । “प्रणाली भित्रने सम्भावना देखिएको छ, तर ठूलो सिस्टम होइन,” उनले भने, “कर्णालीमा चाहिँ हिमपात र वर्षाको सम्भावना देखिन्छ ।”

देशमा बरु अब प्रिमनसुनका गतिविधि बढ्दै जाने उनले उल्लेख गरे । स्थानीय वायुको प्रभाव बढ्ने र दिउँसोतिर बादल विकसित भएर हावाहुरी, चट्याङ, वर्षाको सम्भावना हुने उनले बताए ।

• सुरु भयो प्रिमनसुन : चल्छ हावाहुरी, हुन्छ गड्याङगुडुङ

जलवायुविज्ञ डा. धर्मराज उप्रेती भने फागुन २६ गतेदेखि आउने पश्चिमी वायुले पूर्वी भागसम्म बदलीको अवस्था हुने बताउँछन् । “फाल्गुन २६ देखि आउने नयाँ पश्चिमी वायुले फाल्गुनको २७ गतेदेखि चैत १ गतेसम्म सुदूरपश्चिम, कर्णाली हुँदै पूर्वी भागमा पुनः बदलीको अवस्था,” उनले शनिबार फेसबुकमा लेखेका छन् ।

उनले फागुन २९ देखि चैत १ गतेसम्म हावाहुरी, असिनापानीको सम्भावना पनि औँल्याएका छन् ।