काठमाडौं । भौतिक पूर्वाधार तथा यातायातमन्त्री देवेन्द्र दाहालले भन्सार क्षेत्रमा नै तौलपुल राख्ने तयारी भइरहेको जानकारी दिएका छन् । 

सोमबार सिंहदरबारमा यातायात व्यवसायीको ध्यानाकर्षणपत्र बुझ्दै मन्त्री दाहालले भारतबाट नेपाल भित्रिने मालवाहक सवारीको भारवहन मापन गर्न भन्सार क्षेत्रमा नै तौलपुल राख्ने तयारी भइरहेको जानकारी दिए । 

यातायात व्यवसायीले भारवहन सीमा कडाइका साथ कार्यान्वयन गर्नुपर्नेलगायत आठबुँदे मागका विषयमा भौतिक पूर्वाधार तथा यातायातमन्त्री दाहाललाई ध्यानाकर्षण पत्र बुझाएका हुन् । 

मन्त्री दाहालले यसका लागि भौतिक पूर्वाधार तथा यातायात मन्त्रालय, गृह मन्त्रालय, उद्योग र अर्थ मन्त्रालयबीच छिटै छलफल हुने बताए । उनले देशभर रहेका १२ वटा तौलपुललाई केन्द्रीय डाटा प्रणालीमा जोडिने जानकारी दिए । 

भारवहन सीमा उल्लंघन हुँदा पुल र सडकमा क्षति पुग्ने भएकाले कडाइका साथ लागु गर्ने र देशका अन्य आवश्यक स्थानमा समेत प्रविधिमैत्री तौलपुल जडान गर्ने प्रतिबद्धता जनाए । 

भारवहनसम्बन्धी कार्यविधिमा रहेका विषय लागु नभएको भन्दै उनले यसलाई बाध्यात्मक रूपमा लागु गराइने बताए ।