काठमाडौं । नेपालस्थित सहारा क्लबको अस्ट्रेलिया शाखा सहारा अस्ट्रेलियाले सिड्नीमा १०औँ वार्षिकोत्सव मनाएको छ । सिड्नीको टेम्पे पार्कमा आयोजित वार्षिकोत्सव समारोहमा क्लबका संस्थापक स्वर्गीय राजमान थकालीको योगदानको सम्झना गरिएको थियो ।

सहारा क्लबलाई अस्ट्रेलिया भित्र्याएको १०औँ वर्ष पुगेको अवसरमा सहारा अस्ट्रेलियाको लोगो तथा आगामी सहारा कप फुटबलको मिति पनि सार्वजनिक गरिएको छ ।

कार्यक्रममा संस्थाका अध्यक्ष सिद्धार्थ पौडेलले यस वर्षको सहारा कप आउँदो १७ अगस्टदेखि १४ सेप्टेम्बरसम्म राइडलमेर पार्कमा आयोजना गर्ने तय भएको जानकारी दिए । क्लबको नयाँ जर्सी र लोगो अध्यक्ष पौडेलले नै सार्वजनिक गरेका थिए ।

उनले पोखरेली माझ लोकप्रिय रहेको सहारा क्लबको अस्ट्रेलिया शाखा पनि फुटबल र सामाजिक कार्यमा अग्रसर रहेको बताए । "क्लबका संस्थापक स्वर्गीय राजमान थकालीको सपनालाई हामी खेर जाने दिने छैनौँ," अध्यक्ष पौडेलले भने ।

कार्यक्रममा एनआरएन न्यू साउथ वेल्सका सचिव कल्याण खड्काले सहारा क्लबले अस्ट्रेलियामा आफ्नो अलग पहिचान बनाउन सफल भएको बताए । "सहारा अस्ट्रेलियाले यसको नामअनुरूप काम गरेको छ । यसमा सबै फुटबलप्रेमीले गर्व महसुस गर्नुपर्छ," उनले भने ।

संस्थाकी महासचिव जेशिका तामाङले क्लबको जर्सी बिक्री गरेर आर्थिक संकलन गरिएको जानकारी गराइन् ।

कार्यक्रममा एनआरएन अस्ट्रेलियाका अध्यक्ष अनिल पोखरेल, पूर्वअध्यक्ष नन्द गुरुङ, समदायका नेता हेउपती गुरुङ, एन्फा अस्ट्रेलियाका अध्यक्ष विजय राउतलगायतले सहाराको सफलताको शुभकामना दिएका थिए ।