काठमाडौं । राष्ट्रिय मुक्ति पार्टी नेपालका अध्यक्ष राजेन्द्र महतोले वर्तमान सरकार देश बनाउन नभइ लुटतन्त्रलाई लुकाउन बनेको टिप्पणी गरेका छन् ।

सोमबारबाट काठमाडौंमा सुरु पार्टीको प्रथम केन्द्रीय कार्यसमितिको विस्तारित बैठकमा सञ्चारकर्मीसँग कुरा गर्दै महतोले भने, "कांग्रेस, एमाले र माओवादीले देशमा लुटतन्त्र मच्चाइरहेको छ, अहिलेको ठूला दल मिलेर बनेको सरकार पनि देश बनाउन नभई लुटतन्त्रलाई लुकाउन बसेको सरकार हो ।"

उनले ठूला भनिएका तीन पार्टी र पात्रले देशलाई बर्बाद बनाएको जिकिर गरे । सदनमा अंकगणित देखाएर शक्ति देखाउने काम धेरै दिन नटिक्ने उनको भनाइ थियो । महतोले सबैको अधिकारका लागि सवै पहिचानवादीहरू गोलबन्द हुनुपर्नेमा जोड दिए ।

केन्द्रीय कार्यसमितिको विस्तारित बैठकमा महतोले राजनीतिक प्रतिवेदन प्रस्तुत गरेका छन् । प्रतिवेदनमा विचौलियाहरूलाई फाइदा पुग्नेगरी सरकारले भूमिसम्बन्धी अध्यादेश ल्याएको उल्लेख गरिएको छ । त्यस्तै, महतोले कांग्रेस दक्षिणपन्थी ध्रुवमा खुम्चिएको टिप्पणी गरे भने एमाले नवपुँजीवादी र मध्यम वर्गीय स्वार्थमा फसेको उल्लेख गरे ।