काठमाडौं । जस इंग्लिसको शतकप्रेरित अस्ट्रेलियाले आईसीसी च्याम्पियन्स ट्रफीमा कीर्तिमानी जित निकालेको छ ।

शनिबार पाकिस्तानको लाहोरमा भएको खेलमा अस्ट्रेलियाले इंग्ल्यान्डविरुद्ध पाँच विकेटको जित निकालेको हो । खेलमा इंग्ल्यान्डले प्रस्तुत गरेको ३५७ रनको विशाल लक्ष्य अस्ट्रेलियाले ४७.३ ओभरमा पाँच विकेट गुमाएर पूरा गर्यो । आईसीसीले आयोजना गरेको पुरुष क्रिकेट प्रतियोगितामा कुनै पनि टिमले भेट्टाएको यो अहिलेसम्मकै ठूलो लक्ष्य हो । 

अस्ट्रेलियाको जितमा मध्यक्रम ब्याटर इंग्लिसले ८६ बलमा आठ चौका र ६ छक्कासहित १२० रन बनाए । यस्तै, एलेक्स क्यारीले ६३ बलमा आठ चौकासहित ६९ रन थपे । यी दुईले १३६–४ को स्थितीबाट पाँचौँ विकेटका निम्ति १४२ रनको साझेदारी गर्दै अस्ट्रेलियाको इनिङ सम्हालेका थिए । 

यसबाहेक, ओपनर म्याथ्यु सर्टले ६६ बलमा नौ चौका र एक छक्कासहित ६३ रन थपे । मार्नुस लाबुसचेन्जले ४७ र ग्लेन म्याक्सवेले ३२ रन जोडे । 

इंग्ल्यान्डका मार्क वुड, जोफ्रा आर्चर, ब्राइडन कार्ज, आदिल राशिद र लियम लिभिङस्टोनले समान एक विकेट लिए । 

त्यसअघि टस हारेर ब्याटिङमा आएको इंग्ल्यान्डले बेन डकेटको उत्कृष्ट ब्याटिङमा ३५६ रनको योगफल खडा गरेको थियो । 

इंग्ल्यान्डका ओपनर डकेटले १४३ बलमा १७ चौका र तीन छक्कासहित १६५ रन बनाए । यस्तै, जोए रुटले ६८ रन थप्दा कप्तान जस बटलरले २३, जोफ्रा आर्चरले २१, जामी स्मिथले १५ र लियम लिभिङस्टोनले १४ रन जोडे । 

अस्ट्रेलियाका डेन ड्वारसुइसले तीन विकेट लिए । एडम जाम्पा र मार्नुस लाबुसचेन्जले समान दुई विकेट लिँदा ग्लेन म्याक्सवेलले एक विकेट हात पारे ।

प्रतियोगिताको पहिलो खेलमै जित निकालेको अस्ट्रेलिया समूह ‘बी’को दोस्रो स्थानम उक्लिएको छ । पहिलो खेलमै हार बेहोरेको इंग्ल्यान्ड तालिकाको तेस्रो स्थानमा छ ।