काठमाडौं । तेस्रो संस्करणको नेपाल सुपर लिग (एनएसएल)को ‘मिनि अक्सन’ सम्पन्न भएको छ । शनिबार काठमाडौंमा गरिएको मिनि अक्सनबाट लिगमा सहभागी हुने सात टिम करिब तयार भएको छ ।

आउँदो चैतमा आयोजना गरिने प्रतियोगितामा ललितपुर सिटी एफसी, काठमाडौं रेजर्स, धनगढी एफसी, झापा एफसी, एफसी चितवन, पोखरा थन्डर्स र बुटवल–लुम्बिनी सहभागी हुनेछन् ।

क्याटोगोरी ‘ए’मा १५ र ‘बी’मा ४५ गरी कुल ६० खेलाडी मात्र अक्सनमा राखिएका थिए । क्याटोगोरी ‘ए’का खेलाडीको बेस प्राइस दुई लाख र म्याक्सिमम प्राइस चार लाख रुपैयाँ तोकिएको थियो । क्याटोगोरी ‘बी’का खेलाडीको बेस प्राइस एक लाख ५० हजार र म्याक्सिमम प्राइस दुई लाख रुपैयाँ तोकिएको थियो ।

मिनि अक्सनमा आठ खेलाडी सर्वाधिक चार लाख रुपैयाँमा बिक्री भए । चार लाखमा बिक्री हुनेमा मणिकुमार लामा, अभिषेक लिम्बू, सुमित श्रेष्ठ, पासाङ लामा, आशीष गुरुङ, दिनेश हेम्जन, जेलेस्पीजंग कार्की र सन्तोष कार्की छन् ।

अक्सनमा केही नाम चलेका खेलाडी बिक्री भएनन् । मिनि अक्सनसँगै अब विदेशी र स्थानीय खेलाडी छनोट हुन बाँकी रहेको बताइएको छ । हिमालयन टेली भ्वाइस