बाह्रखरी मिडिया आफ्नो स्थापनाको नवौं वर्ष पूरा गरी आज दसौं वर्षमा प्रवेश गरेको छ । यस अवधिमा हामीलाई विश्वसनीय सञ्चार माध्यमका रूपमा अपनाएर दैनिक समाचार, विचार र सूचनाको प्रमुख स्रोत बनाउनुहुने सम्पूर्ण उपयोगकर्ताहरूमा हार्दिक धन्यवाद व्यक्त गर्दछौँ । आगामी दिनमा हाम्रो व्यावसायिक पत्रकारिताको धर्म पालनामा कुनै प्रकारको सम्झौता नगर्ने प्रण दोहोर्‍याउँदै पत्रकारिताको उन्नयनका लागि नयाँ शैलीको संघर्षको उद्घोष गर्दछौँ ।

गएको दशक संसारभरकै पत्रकारिताका लागि दुष्कर समय रह्यो । छापा माध्यम कमजोर हुँदै गयो, टेलिभिजनका दर्शक कम भए, रेडियोको प्रभावकारिता बढेन तथापि धेरै खस्केन तर डिजिटल समाचार माध्यम च्याउसरी उत्पन्न भए । पत्रकारिताको मूल्य र प्रभावकारितामा यसअघि कहिल्यै यति ह्रास आएको थिएन जति गएको दस वर्षमा यो खिइयो । अहिले संसारभर नै कुनै पनि यस्तो संचार माध्यम देखिएको छैन जस्को सत्य, तथ्य र निष्पक्षतामा पाठकले कसम खान सकून् । 

पत्रकारितामा आएको ह्रासका कारणले संसारभरनै लोकतन्त्रको सहारामा अधिनायवादी चरित्रका नेताहरूको उदय भयो । संसारभरनै निर्वाचनबाटै धर्मान्धता, उग्र राष्ट्रवाद, दलाल पुँजीवादको उठान भएको छ । लोकतन्त्र, नागरिक अधिकार, समानता, उदारवाद बिक्न छाडेको छ, ‘स्टन्टबाज’ले जनमत बटुल्न थालेका छन् । यस्तो अवस्थामा लोकतन्त्र, उदारवाद र कानुनको शासनको पक्ष पोषणगर्ने मिडियालाई आफ्नो आस्था जोगाएर जनतालाई सही दिशा देखाउन हम्मे हम्मे परेको छ । बाह्रखरी पनि यही अप्ठेरो अवस्थामा आफ्ना आदर्श र व्यावसायिकतालाई जोगाउँदै अगाडि बढेको छ । 

नेपालको परिप्रेक्ष्यमा कुनै पनि निजी सञ्चार माध्यमले आफूलाई सशक्त आर्थिक र व्यावसायिक स्थितीमा भएको महसुस गर्ने अवस्था छैन । हाम्रा पाठकहरू सबै सामाजिक सञ्जालमा अलमलिएका छन् । हाम्रा विज्ञापनदाताहरू पनि सामाजिक संजालको माध्यमबाट आफ्नो वस्तु र सेवाको विज्ञापन गर्न तल्लिन छन् । हाम्रा पाठक, दर्शक, स्रोता कुनै पनि समाचार, सूचना र विचार कसले प्रेषित गर्‍यो, कुन सञ्चार माध्यम सशक्त र विश्वसनीय छ भन्नेमा भन्दा कुन सामाजिक संजालको मंच (प्लेटफार्म)ले के दियो भनेर छलफल गर्छन् ।

आजको दिनमा नेपालीपनको, नेपालको सार्वभौमिकता, अखण्डता र अक्षुणता सुरक्षा गर्ने देशको स्वार्थमा सम्झौता नगर्ने मिडिया कसैलाई नचाहिएको जस्तो देखिन्छ । सरकारलाई पनि यसमा खास चासो भएको देखिँदैन । तर, अहिलेको बदलिंदो विश्व राजनीतिक मञ्चमा नेपालीपन जर्गेना र सुरक्षा गर्ने विश्वसनीय समाचार माध्यम जीवित रहेन भने भोलि कुनै पनि महाशक्ति राष्ट्रले नेपालको स्वाधीनताविपरीत कुनै कार्य गरेको अवस्थामा हाम्रो प्रतिरक्षा कसले गर्छ ? के सामाजिक सञ्जालका सञ्चालकहरूले नेपालको हितमा बोलेर शक्ति राष्ट्रको विरोध गर्लान् ?

जुनबेला जनताका अधिकारहरू कुंठित भएका थिए र राजनीतिक दलहरू जनस्तरमा अत्यन्त अप्रिय बनिरहेका थिए त्यसबेला नेपालको उदारवादी खेमाका पत्रकारहरूले लोकतान्त्रिक अधिकारका लागि संघर्षको बिगुल फुके । विडम्बना, जब लोकतन्त्र आयो अनि राजनीतिक दलहरूका विरुद्ध स्पष्ट बोल्ने र उनीहरूले गरेका गलत कृत्य जनतामाझ पुर्‍याउने मिडियाको खेदो खन्ने कार्य सुरु भयो । स्थापित हुन् वा नयाँ राजनीतिक दलका नेता, सबैले स्वतन्त्र मिडियाको विपक्षमा आफूले सकेको योगदान गरे । अहिले संविधान विरोधी, व्यवस्था विरोधी र लोकतान्त्रिक व्यवस्था उखेल्ने शक्तिको उदय हुँदै गर्दाको अवस्थामा ठूला राजनीतिक दलको केही चेत खुलेको हुनुपर्छ । तर, समय घर्किदैं गएको छ । लोकतान्त्रिक, निष्पक्ष र स्वतन्त्र मिडियाको हितका लागि सरकारले अविलम्ब उपयुक्त कदम चाल्नुपर्ने अवस्था अपरिहार्य भएको छ ।

यस्तो अत्यन्त विकट परिस्थितिबीच संघर्षरत रहँदै स्वतन्त्र र निष्पक्ष पत्रकारितालाई अघि बढाउँदै गर्दा हाम्रा होस्टेमा हैंसे गर्ने हाम्रा पाठक, विज्ञापनदाता, सहयोगी मित्र र लोकतन्त्र तथा स्वतन्त्रताका पक्षधरहरूप्रति हामी सदा नतमस्तक छौँ । हाम्रा गल्तीहरू औंल्याउने र कतिपय साना गल्तीलाई सहज ढंगले माफ गरिदिने पारखी शुभेच्छुकप्रति हामी सधैँ आभारी रहनेछौँ ।

आउँदो वर्षमा हामी बढीभन्दा बढी पाठकका मोबाइल फोन र कम्प्युटर स्क्रिनमा धेरैभन्दा धेरै पटक उपस्थित हुन उपयुक्त सामग्री, सक्रियता र विश्वसनीयताका साथ प्रस्तुत हुने प्रण गर्दछौँ । 

धन्यवाद ।