काठमाडौं । भारतको ओडिसास्थित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयका उपकुलपति प्रा. सरनजीत सिंहले नेपाली विद्यार्थीहरूसँग माफी गर्दै उनीहरूलाई क्याम्पसमा फर्कन अपिल गरेका छन् ।

उपकुलपति सिंहले मंगलबार एक क्षमायाचना पत्र जारी गर्दै नेपाली विद्यार्थीलाई फर्कन अपिल गरेका हुन् ।

“जे भयो त्यसको लागि हामी माफी चाहन्छौँ र यसैद्वारा सबै विद्यार्थी र नेपालका जनताप्रति हाम्रो माया र स्नेह प्रकट गर्दछौँ । हामी उनीहरूलाई त्यति नै माया गर्छौँ जति हामी भारतका जनता र विश्वका जनतालाई माया गर्छौँ । हामी हाम्रा नेपाली विद्यार्थीहरूलाई तुरुन्तै नियमित शैक्षिक कार्यक्रममा सामेल हुन पुनः अपील गर्दछौँ,” उपकुलपति सिंहले भनेका छन् ।

१६ फेब्रुअरी २०२५ को साँझ क्याम्पसमा भएको अप्रिय घटनाबाट आफूहरू अत्यन्तै स्तब्ध भएको उनले जनाएका छन् । उक्त दिन विश्वविद्यालयको गर्ल्स होस्टेलमा नेपाली छात्रा प्रकृति लम्साल मृत अवस्थामा भेटिएकी थिइन् । प्रारम्भिक अनुसन्धानले उनले आत्महत्या गरेको देखिएको छ ।

त्यसपछि नेपाली विद्यार्थीले अनुसन्धानको माग गर्दै आन्दोलन गरेका थिए । आन्दोलन चर्केपछि विश्वविद्यालय प्रशासनले नेपाली विद्यार्थीलाई तत्काल होस्टेल छोडी नेपाल फर्कन निर्देशन दिएको थियो ।

विश्वविद्यालय प्रशासनले जर्बजस्ती ५ सयभन्दा बढी नेपाली विद्यार्थीलाई बसमा राखी रेल स्टेसनमा लगी छोडेको थियो । त्यसक्रममा विश्वविद्यालयका कर्मचारी र सुरक्षा गार्डले नेपाली विद्यार्थीमाथि दुर्व्यवहार गरेका थिए ।

“हामीमध्ये केहीले आन्दोलनकारी विद्यार्थीहरूसँग गरेको दुर्व्यवहारप्रति पनि हामी दुःखी छौँ । हामी हाम्रा विद्यार्थीहरूलाई माया गर्छौँ र उनीहरूलाई कहिल्यै कुनै अपमान गरेका छैनौँ । हाम्रा दुई अधिकारीहरूले गरेका टिप्पणीहरू अत्यन्तै गैरजिम्मेवारपूर्ण छन्,” उपकुलपति सिंहले भनेका छन् ।

यद्यपि, कर्मचारीले गरेको टिप्पणीहरू उनीहरूको व्यक्तिगत भएको उनले जनाएका छन् । उनीहरूलाई सेवाबाट हटाइएको जानकारी पनि उनले दिएका छन् । ती अधिकारीहरूले आफ्नो टिप्पणीलाई लिएर माफी मागीसकेको उपकुलपछि सिंहले जनाएका छन् ।