काठमाडौं । अखिल भारतीय विद्यार्थी परिषद्ले ओडिसाको कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी)को होस्टेलमा भएको नेपाली छात्राको मृत्युको निष्पक्ष अनुसन्धानको माग गरेको छ ।

परिषद्ले एक विज्ञप्ति जारी गर्दै केआईआईटीको गर्ल्स  होस्टेलमा भएको २० वर्षीया नेपाली छात्रा प्रकृति लम्सालको मृत्युलाई दुर्भाग्यपूर्ण बताएको छ ।

“अखिल भारतीय विद्यार्थी परिषद्ले ओडिसाको कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी)मा नेपाली विद्यार्थी प्रकृति लम्सालको दुर्भाग्यपूर्ण मृत्युमा गहिरो समवेदना व्यक्त गर्दछ र घटनाको निष्पक्ष र पूर्ण अनुसन्धानको माग गर्दछ,” परिषद्ले जारी गरेको विज्ञप्तिमा भनिएको छ ।

शंकास्पद परिस्थितिमा नेपाली छात्राले गरेको आत्महत्याको घटनामा न्यायको लागि गुहार मागिरहेका विद्यार्थीहरूलाई दबाउने विश्वविद्यालय प्रशासनको प्रयास अत्यन्तै निन्दनीय भएको परिषद्ले जनाएको छ ।  

“विशेषगरी, नेपाली विद्यार्थीहरूलाई क्याम्पस परिसरबाट बाहिरिन दिइएको आदेश गैरकानुनी मात्र होइन, मानव अधिकारको गम्भीर उल्लंघन र भारत–नेपाल सम्बन्धमाथि गरिएको प्रहार पनि हो,” परिषद्ले भनेको छ ।

न्यायको माग गरिरहेका विद्यार्थीहरूको आवाज दबाउनुको सट्टा प्रशासनले प्रकृति लम्सालको आत्महत्याको पछाडिका कारणहरूको गहन अनुसन्धान सुनिश्चित गर्नुपर्ने परिषद्ले जनाएको छ ।  

केआईआईटी विश्वविद्यालय प्रशासनले देखाएको असंवेदनशीलतामाथि शिक्षा र गृह मन्त्रालयको तत्काल हस्तक्षेप गर्न आवश्यक रहेको परिषद्ले औंल्याएको छ ।

“ओडिसाको केआईआईटी जस्तो प्रतिष्ठित शैक्षिक संस्थामा शंकास्पद परिस्थितिमा एक नेपाली विद्यार्थीले आत्महत्या गरेको खबर अत्यन्तै दुःखद र हृदयविदारक छ । यस्तो अवस्थामा निष्पक्ष अनुसन्धानबाट भाग्दै प्रशासनले नेपाली मूलका विद्यार्थीहरूलाई क्याम्पस खाली गर्न दिएको आदेश अत्यन्तै असंवेदनशील र अमानवीय छ,” परिषद्का राष्ट्रिय महासचिव डा. वीरेन्द्रसिंह सोलंकीले भनेका छन् ।

परिषद्का कार्यकर्ताहरूले नेपाली विद्यार्थीहरूलाई भेटेर अन्यायविरुद्धको यो लडाइँमा उनीहरूलाई हरसम्भव साथ दिने आश्वासन दिएको समेत विज्ञप्तिमा जनाइएको छ ।