विराटनगर । कोसी प्रदेशसभाको हिउँदे अधिवेशन जारी छ । सभामा प्रस्तुत भएको कोसी आमसञ्चार सम्बन्धमा व्यवस्था गर्न बनेको विधेयकमाथिको सैद्धान्तिक छलफल पूरा भएको छ । संशोधनको सूचनापछि अब यो विधेयकमा दफावार छलफल हुनेछ ।
 
कोसी प्रदेशसभामामा विधेयक दर्ता हुनासाथ त्यसको एकप्रति सांसदहरूलाई उपलब्ध गराउने प्रावधान छ । सदनमा टेबुल भएपछि सहजताका लागि वेबसाइटमार्फत पनि सार्वजनिक गरिन्छ । दर्ता हुनासाथ सांसदहरूलाई उपलब्ध गराउन पिजन होलमा विधेयक र आवश्यक सूचना राख्ने प्रबन्ध गरिएको छ । तर, कोसी प्रदेशसभाका थोरै सांसदले मात्र पिजन होलको प्रयोग  नगरेको पाइएको छ ।

सभाको पहिलो कार्यकालमै सांसदहरूका महत्वपूर्ण कागजात, फायल, विधेयक, निमन्त्रणपत्र राख्न मिल्ने गरी पिजन होलको व्यवस्था गरिएको थियो । तर, त्यसको प्रयोग गर्न भने सांसदहरू उदासीन देखिएका छन् ।

कोसी प्रदेशसभाका सूचना अधिकारी निरज ढकालले बताएअनुसार दर्ता हुनासाथ विधेयक र महत्वपूर्ण सूचना पिजन होलमा राखिदिने गरिएको छ । “हामीले पहिल्यै विधेयक राखिदिएका हुन्छौँ तर, त्यहाँ नहेरी पछि पनि प्रदेशसभा सदस्यहरुले हामीसँग विधेयकको कपी मागिरहनु भएको हुन्छ,” ढकालले भने । 

मंगलबार बाह्रखरी संवाददाता सभाको पिजन होल पुग्दा भरिभराउ देखिएको थियो । त्यहाँका कोठा विधेयक, सांसदलाई विभिन्न संघसंस्थाले पठाएका निमन्त्रणापत्रलगायत सामग्रीले भरिएको देखिन्थ्यो । कतिपय सांसदका पिजन होलमा धेरैअघि सभामा दर्ता भएका विधेयकहरूको चाङ नै देखिएको थियो । पिजन होलबाट विधेयक नलैजानेमा कांग्रेस, एमाले र माओवादी केन्द्रका सांसद धेरै थिए । पिजन होलबाट विधेयक नलैजानेमा पूर्वमुख्यमन्त्रीहरू समेत रहेको पाइएको छ ।

सभाले पिजन होलमा सांसदको नाम लेखेर चाबीसमेत उनीहरूलाई नै दिने व्यवस्था मिलाई दिएको सूचना अधिकारी ढकालले बताए । उनले भने, “तर, पछिल्लो समय भने धेरै माननीयज्यूहरू ले विधेयक नलगेको पाइएको छ ।”

नेपाली कांग्रेसका प्रदेश सांसद भीम पराजुलीले आफूले नभ्याउँदा स्वकीय सचिवमार्फत विधेयक मगाएर अध्ययन गर्ने गरेको बताए । उनले भने, “यसको सूचना एसएमएसबाट पनि आउने भएकाले त्यहाँ के राखिएको छ भन्ने सूचना सजहै प्राप्त हुन्छ ।”