विराटनगर । नेकपा (एकीकृत समाजवादी)का सम्मानित नेता एवं पूर्वप्रधानमन्त्री झलनाथ खनालले वर्तमान सरकारले मुलुकलाई अधोगतितर्फ लगेको आरोप लगाएका छन् । सोमबार विराटनगरमा सञ्चारकर्मीसँग उनले नेपाली कांग्रेस र नेकपा (एमाले)को अधिनायकत्व बढ्दा मुलुक अधोगतितर्फ गएको जिकिर गरे ।

“दुई पार्टी (कांग्रेस र एमाले)को अधिनायकत्वले मुलुकलाई अग्रगतितर्फ नभई उल्टो दिशातर्फ लग्दै छ,” खनालले भने, “अहिले लोकतान्त्रिक मूल्य–मान्यतालाई चुनौती दिने स्थिति देखा परेको छ ।”

उनले दुई ठूला पार्टीकै कारण वर्तमान राजनीति क्रमिक रूपले संकटतर्फ उन्मुख भएको टिप्पणी गरे ।

आर्थिक क्षेत्रमा कुनै प्रगति नदेखिएको र मूल्यवृद्धिले समस्या निम्तिएको उनले बताए । उचित ढंगले उद्योगधन्दाको विकास नहुँदा रोजगारी सिर्जना हुन नसकेको उनले उल्लेख गरे । उनले भने, “कृषि क्षेत्र त झन्झन् गतिहीन बन्दै गइरहेको छ ।”

नेता खनालले संविधानले पूर्वराष्ट्रपति/उपराष्ट्रपतिलाई राजनीतिमा आउन नरोकेको स्पष्ट पारे । त्यसरी आउनु/नआउनु व्यक्तिगत र नैतिक विषय भएको उनले बताए ।

संविधानतः बनाइनुपर्ने तीन दर्जन कानुन अझै थाती रहेको उनले सुनाए । उनले भने, “संविधानको भाग ४ मा जुन खालका नीति र सिद्धान्तहरू अघि सारिएको छ, एउटा पनि लागु भएको छैन ।” यस्तो सन्दर्भमा संविधान संशोधनले केही अर्थ नराख्ने उनको धारणा छ ।