काठमाडौं । रित गौतमको शतकप्रेरित क्रिकेट एक्सिलेन्स सेन्टरले फाइनलमा ग्रेट हिमालय क्रिकेट एकेडेमीविरुद्ध १०७ रनको जित निकाल्दै प्रधानमन्त्री कप काठमाडौं जिल्ला छनोटको उपाधि जितेको छ । आइतबार मूलपानीस्थित माथिल्लो मूलपानी क्रिकेट मैदानमा सम्पन्न खेलमा क्रिकेट एक्सिलेन्सले प्रस्तुत गरेको २६२ रनको लक्ष्य पछ्याउने क्रममा ग्रेट हिमालयनले २६.५ ओभरमा सबै विकेट गुमाएर १५४ रनमात्र बनाउन सक्यो ।

ग्रेट हिमालयबाट इशान पाण्डेले शतक बनाए पनि टिमको हार टार्न सकेनन् । इशानले ८६ बलमा १०७ रन बनाए । यस्तै, रितेश आग्रीले २६ रन थपे ।

क्रिकेट एक्सिलेन्सका पृथु बास्कोटा, विवेकानन्द सहनी र दयानन्द मण्डलले समान दुई विकेट लिए । 

त्यसअघि पहिले ब्याटिङमा आएको क्रिकेट एक्सिलेन्सले निर्धारित ५० ओभरमा नौ विकेट गुमाएर २६१ रनको योगफल खडा गरेको थियो ।

क्रिकेट एक्सिलेन्सका रितले १२९ बलमा ११३ रन बनाए । विरेन्द्र धनदीले ६७ र पृथु बास्कोटाले ४१ रन थपे । 

ग्रेट हिमालयका इशान पाण्डेले चार विकेट लिए । किरन बुढामगरले तीन र दर्षिल विष्टले एक विकेट हात पारे ।

हारका बाबजुद ग्रेट हिमालयका इशान पाण्डे प्रतियोगिताको उत्कृष्ट खेलाडी घोषित भए । यस्तै, महावीरका सोनु देवकोटा उत्कृष्ट ब्याटर बन्दा न्यु भिजनका मनसुन सिंह उत्कृष्ट बलर चुनिए ।