site stats
बाह्रखरी :: Baahrakhari
कला
Global Ime bankGlobal Ime bank
‘एक्टर : टेक वान’को टिकट लिएका दर्शकको पैसा कसरी हुन्छ फिर्ता, केही सिनेमा घर अझै मौन 

काठमाडौं । काठमाडौं जिल्ला अदालतको आदेशसँगै चलचित्र ‘एक्टर : टेक वान’को आजबाट हुने भनिएको प्रदर्शन रोकिएको छ । तत्कालका लागि प्रदर्शन रोक्न अदालतले आदेश दिएपछि ‘एक्टर : टेक वान’ आजबाट प्रदर्शनको तयारीमा रहे पनि पछि हट्न बाध्य भयो । 

काठमाडौं जिल्ला अदालतले अर्को आदेश नआउँदासम्मलाई प्रदर्शन रोक्न भन्दै दुवै पक्षलाई माघ २२ गतेका लागि बोलाएको छ । कम्तीमा २२ गतेसम्म कानुनी रूपमा यो चलचित्र प्रदर्शनमा आउन पाउने छैन । 

प्रदर्शन रोकिएसँगै अग्रिम टिकट बुकिङ गरेका दर्शकको पैसा सिनेमा हलहरूले फिर्ता गर्नुपर्ने भएको छ । प्रदर्शन हुने भनिएको मितिमा चलचित्र रिलिज हुन नसकेपछि सिनेमा हलहरू दर्शकको पैसा फिर्ता गर्न बाध्य भएका हुन् ।  

देशकै ठूलो मल्टिप्लेक्स चेन क्यूएफएक्सले टिकटको पैसा फिर्ता गर्ने प्रतिबद्धता जनाउँदै सूचना निकालेको छ । जिल्ला अदालतले जारी गरेको अन्तरिम आदेशका कारण र सम्बन्धित निकायबाट थप स्पष्टता नआएको अवस्थामा आज बिहानको शोहरूमा चलचित्र चलाउन नसकिएको सूचनामा उल्लेख छ । 

क्यूएफएक्सले भनेको छ, “निर्धारित शोटाइमका लागि सबै टिकटहरू पूर्ण रूपमा फिर्ता गरिनेछ । आवश्यक स्पष्टता प्राप्त भएपछि हामी शोहरू पुनः तय गर्नेछौँ ।” 

पैसा फिर्ता हुने जनाए पनि कसरी गर्ने त्यो उल्लेख गरिएको छैन । यसअघि क्यूएफएक्सलगायत सिनेमा घरहरूले यस्तो अवस्थामा हलको बक्सअफिसको काउन्टरमा आउन सूचित गर्थे । 

यसअघि, ‘पुष्पा–२ : द रुल’को थ्रिडी टिकट बेचेका हलहरूले थ्रिडी फाइल इन्डियाबाट नआएपछि प्रतिटिकट ५० रुपैयाँका दरले दर्शकलाई फिर्ता गर्नुपरेको थियो । यसका लागि हलले दर्शकलाई बक्सअफिसको काउन्टरमा आएर पैसा फिर्ता लिन भनेका थिए । 

‘एक्टर’ चलचित्रसँग नाम र कथावस्तु मिलेको भन्दै गत शुक्रबार अदालतमा मुद्दा परेको थियो । अदालतमा मुद्दा परेपछि मंगलबार (हिजो)का लागि दुवै पक्षलाई बोलाइएको थियो ।

मंगलबार अदालतले के निर्णय दिन्छ भन्ने यकिन नहुँदै हलले जबरजस्ती बुकिङ खुला गरेका थिए । ‘एक्टर : टेक वान’मा बुकिङ भने उच्च देखिएको थिएन । 

यता, वान सिनेमाजले भने अझै शो हटाएको छैन । दर्शकलाई  केही जानकारी पनि दिएको छैन । 

‘एक्टर’लाई मदन घिमिरेले निर्देशन गरेका थिए । ‘एक्टर’ माघ ४ गते नै रिलिज भइसकेको छ । 

‘एक्टर : टेक वान’लाई राजन भुसालले निर्देशन गरेका छन् । यो चलचित्रमा प्रदीप खड्का, राजबल्लभ कोइराला, दिब्या रायमाझी, आना शर्मालगायत कलाकारको अभिनय छ । प्रिमियरमा सिनेमा हेर्नेहरूले चलचित्रको तारिफ गरिरहेका छन् । 

प्रकाशित मिति: बुधबार, माघ १६, २०८१  ०७:५४
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
सम्पादकीय
सरकारले तत्काल सम्बोधन गरोस् !
सरकारले तत्काल सम्बोधन गरोस् !
Hamro patroHamro patro