काठमाडौं । काठमाडौं जिल्ला अदालतले नेपाली सिनेमा ‘एक्टर : टेक वान’ तत्काल हलमा प्रदर्शन नगर्न अल्पकालीन अन्तरिम आदेश जारी गरेको छ । मंगलबार (माघ १५) काठमाडौं अदालतका न्यायाधीश ढाकाराम पौडेलको इजलासले यही माघ २२ गतेसम्म उक्त चलचित्रको प्रदर्शन स्थगन गर्न आदेश जारी गरेको हो ।

माघ २२ गते दुवै पक्ष (वादी र प्रतिवादी)लाई अदालतमा डाकिएको छ । अन्तरिम आदेश प्रयोजनका निम्ति माघ २२ गते दुवै पक्षलाई बोलाइएको अदालतका सूचना अधिकारी दीपककुमार श्रेष्ठले बाह्रखरीलाई जानकारी दिए ।

गएको शुक्रबार (माघ १२) चलचित्र ‘एक्टर’ निर्माणपक्षले ‘एक्टर : टेक वान’विरुद्ध अदालतमा रिट निवेदन दायर गरेको थियो । प्रतिलिपि अधिकार ऐनअन्तर्गत मुद्दा दर्ता गरिएको हो ।

चलचित्रको नाम र कथावस्तु दुवै मिलेको भन्दै ‘एक्टर : टेक वान’विरुद्ध मुद्दा दर्ता गरिएको थियो । त्यसपछि दुवै पक्षलाई छलफलका निम्ति मंगलबार (माघ १५) अदालतमा बोलाइएको थियो ।

रिटमा ‘एक्टर : टेक वान’को प्रदर्शन रोक्न माग गरिएको छ । ‘एक्टर : टेक वान’ बुधबार (माघ १६) रिलिज हुने तय थियो । देशकै ठूलो मल्टिप्लेक्स चेन क्यूएफएक्सले आइतबार साँझदेखि ‘एक्टर : टेक वान’को अग्रिम टिकट बुकिङ खुला समेत गरेको थियो ।

‘एक्टर’लाई मदन घिमिरेले निर्देशन गरेका थिए । उक्त चलचित्र रिलिज भइसकेको छ । ‘एक्टर’मा प्रिन्स थापा, कशिस दाहाल, सरोज खनाल, शिवु शाह, मनीषा पाण्डे, निशा केसी भण्डारी, महेन्द्र मैनालीलगायत कलाकारको अभिनय थियो ।

‘एक्टर : टेक वान’लाई राजन भुसालले निर्देशन गरेका छन् । यो चलचित्रमा प्रदीप खड्का, आना शर्मा, दिव्या रायमाझी, राजबल्लभ कोइरालालगायत कलाकारको अभिनय छ ।