काठमाडौं । फाइनलमा भारतको लखनउ विश्वविद्यालयविरुद्ध ५८ रनको जित निकाल्दै नेपालको मध्यपश्चिम विश्वविद्यालयले टी–२० जय नेपाल कप–२०२५ को उपाधि जितेको छ ।

मंगलबार कीर्तिपुरस्थित त्रिवि क्रिकेट मैदानमा भएको फाइनलमा मध्यपश्चिमले दिएको १७६ रनको लक्ष्य पछ्याउने क्रममा लखनउले निर्धारित २० ओभर ब्याटिङ गरे पनि नौ विकेट गुमाएर ११७ रन मात्र बनाउन सक्यो ।

लखनउका ओपनर मनप कन्डपालले सर्वाधिक ५८ रन बनाए पनि टिमको हार टार्न सकेनन् । उनले ५७ बलमा पाँच चौका र दुई छक्का प्रहार गरे । यसबाहेक, लखनउका अन्य ब्याटरको प्रदर्शन भने उल्लेखनीय रहन सकेन । हर्ष वर्धन सिंहले १५ र यस वर्धन सिंहले १४ रन थपे ।

लखनउविरुद्ध मध्यपश्चिमका देवान पुनले तीन विकेट लिए । चार ओभर बलिङ गरेका देवानले २२ रन खर्चिए । राजकुमार साहले दुई विकेट लिँदा रविन्द्रजंग शाही, सुवास भण्डारी र दीनेश अधिकारीले समान एक विकेट लिए ।

त्यसअघि टस जितेर ब्याटिङमा आएको मध्यपश्चिमले दुई ब्याटरको अर्धशतकका निर्धारित २० ओभरमा ६ विकेट गुमाएर १७५ रनको योगफल खडा गरेको थियो ।

मध्यपश्चिमका विपीन खत्रीले अविजित ५९ रन बनाए । उनले २८ बलमा पाँच चौका र चार छक्का प्रहार गरे । यसबाहेक, देवान पुनले ३६ बलमा ६ चौका र दुई छक्कासहित ५८ रन थपे । यी दुईले ८२–५ को स्थितीबाट छैटौँ विकेटका निम्ति ७२ रनको साझेदारी गर्दै मध्यपश्चिमको इनिङ सम्हालेका थिए । यसबाहेक, निश्चिल रावलले १९ र राजकुमार साहले १५ रन जोडे ।

लखनउका अभिषेक सोनी, मनप कन्डपाल र हर्ष वर्धन सिंहले समान एक विकेट लिए । नेपाल, भारत र बंगलादेशका गरी आठ टिम सहभागी प्रतियोगितामा मध्यपश्चिम अपराजित रहँदै च्याम्पियन बनेको हो ।