काठमाडौं । बलिउड अभिनेता सैफ अली खानमाथि आक्रमण गरेको आरोप लागेका शरीफुल इस्लामको फिंगरप्रिन्ट सैफको घरबाट लिइएका नमुनासँग मेल नखाएपछि अनुसन्धान थप जटिल बनेको छ । घटनाबारे अनुसन्धान गरिरहेको अपराध अनुसन्धान विभाग (सीआईडी)ले इस्लामको फिंगरप्रिन्ट नमिलेको बताएको हो ।

आक्रमणको एक हप्तापछि जनवरी २२ मा मुम्बई प्रहरीले सैफको घरमा गएर नमुना संकलन गरेको थियो । प्रहरीले सैफको घरको सिँढी, बाथरुमको ढोका र कान्छो छोरा जेहको कोठाको ढोकाको ह्यान्डलबाट गरी फिंगरप्रिन्टका १९ नमुना संकलन गरेको थियो । तर, कुनै पनि नमुना इस्लामको फिंगरप्रिन्टसँग नमिलेको भारतीय सञ्चारमाध्यमले जनाएका छन् ।

यद्यपि, घटनालगत्तै प्रहरीले यी ठाउँहरूलाई सिल गरेको थियो वा थिएन भन्ने पुष्टि भएको छैन ।

सैफमाथि १५ जनवरीको राति आक्रमण भएको थियो । जनवरी २२ मा मुम्बई प्रहरीले फिंगरप्रिन्ट र अन्य नमुना संकलन गरेर अनुसन्धानका लागि सीआईडीको प्रयोगशालामा पठायो ।

अहिलेसम्म आक्रमणको उद्देश्यबारे प्रस्ट भइसकेको छैन । तर, सैफको टिमले चोरीको प्रयास भएको बताएको छ । आक्रमणमा सैफको घरमा काम गर्ने कामदार आरियामा फिलिप पनि घाइते भएकी थिइन् ।

आक्रमणका क्रममा सैफको घाँटी, ढाड, हात र टाउकोसहित ६ ठाउँमा छुरा प्रहार भएको थियो । लीलावती अस्पतालका चिकित्सकहरूले सैफको मेरुदण्डमा चक्कुको टुक्रा अड्किएको बताएका थिए ।जसलाई शल्यक्रियामार्फत हटाइएको थियो ।