काठमाडौं । सूर्य नेपाल गल्फ टुर २०२४–२५ अन्तर्गतको चौथो प्रतियोगिता सूर्य नेपाल वेस्टर्न ओपनको उपाधि निरज तामाङले जितेका छन् । जयराम श्रेष्ठलाई तीन स्ट्रोकले हराउँदै उपाधि जित्ने क्रममा निरजले समग्रमा १–अन्डर २०६ स्कोर गरे । 

शुक्रबार भने उनले ४–ओभर ७३ स्कोर गरे । उपाधिसँगै उनले नगद एक लाख ५० हजार रुपैयाँ पुरस्कार प्राप्त गरे ।

निरजले पोखरामा उपाधि जितेको यो पहिलोपटक हो । उनको करियरको यो तेस्रो उपाधि हो । उनले गत सिजनमा सूर्य नेपाल काठमाडौं ओपन र यसपालि सूर्य नेपाल वेस्टर्न ओपन जितेका थिए ।

इभन–पार ६९ को कार्ड तयार पारेका जयराम श्रेष्ठ समग्रमा २–ओभर २०९ सहित दोस्रो भए । उनले नगद एक लाख रुपैयाँ हात पारे ।

समग्रमा ३–ओभर २१० को स्कोरमा भुवनकुमार रोक्काले तेस्रो स्थानमा चित्त बुझाए । शुक्रबार उनले ७–ओभर ७६ को प्रदर्शन गरे । उनले ७५ हजार रुपैयाँ पुरस्कार पाए ।

नेपाल नम्बर एक प्रो भुवन नगरकोटीले शुक्रबार २–अन्डर ६७ को स्कोर दर्ज गरे । समग्रमा ४–ओभर २११ सहित चौथो हुँदा उनले ६३ हजार रुपैयाँ प्राप्त गरे ।

समग्रमा ७–ओभर २१४ को स्कोरमा सञ्जय लामा, धन थापा, विष्णुप्रसाद शर्मा र रामे मगरले पाँचौँ स्थान बाँडे । विष्णु र रामेले शुक्रबार ४–ओभर ७२ तथा सञ्जय र धनले ७–ओभर ७६ को स्कोर निकाले । उनीहरूले जनही ४४ हजार ७५० रुपैयाँ पुरस्कार पाए ।

१०–ओभर २१७ सहित कृष्णमान राजबहाक र तोरणविक्रम शाहीले १०औँ स्थानमा प्रतियोगिता सकाए । कृष्णले ६–ओभर ७५ र तोरणले ४–ओभर ७३ मा अन्तिम दिनको खेल सकाए । दुवैले जनही ३३ हजार ५०० रुपैयाँ नगद प्राप्त गरे ।

एमेच्योरतर्फ सुरेश तामाङ पहिलो भए । इभन–पार ६९ को स्कोरमा समग्रमा ९–ओभर २१६ को नतिजा निकाल्दै सुरेशले सुमन परियारलाई दुई स्ट्रोकले हराए ।

समग्रमा ११–ओभर २१८ सहित सुमन काउन्ट ब्याकमा दोस्रो भए । उनले शुक्रबार ३–ओभर ७२ स्कोर गरे । दोस्रो दिनका लिडर सुन्दर राई शुक्रबार ९–ओभर ७८ खेल्दै तेस्रो स्थानमा झरे ।

अन्तिम दिनको सुरुआत गर्दा मात्र एक स्ट्रोकले अगाडि रहेका निरजले उत्कृष्ट स्कोर निकाल्न सकेनन् । उनलाई अरू गल्फरले चुनौती दिन नसक्दा ३ स्ट्रोकले उपाधि जितेका हुन् ।

पाँचौँ देखि सातौँ होलमा बोगी खेपेका उनले फ्रन्ट नाइन ३–ओभर ३७ खेले । यसपछि १०औँ होलमा बर्डी प्रहार गरे पनि ११औँ र १८औँ होलमा एक–एक सट खेर फाले । ब्याक नाइन १–ओभर ३६ मा सकाए ।

जयरामले पहिलो होलमा नै ट्रिपल बोगी प्रहार गरे । लगत्तै तेस्रो होलमा एक सट खेर फाले । छैटौँ र नवौँ होलको बर्डीले फ्रन्ट नाइन २–ओभर ३६ मा पूरा गरे । यसपछि ब्याक नाइनमा चार बर्डी र दुई बोगी प्रहार गरे । १०औँ होलमा बर्डी प्रहार गरे भने १२औँ होलमा बोगीको सामना गरे । यसपछि १५औँदेखि १७औँ खेलमा लगातार तीन बर्डीको सफलता प्राप्त गरे । अन्तिम होलमा एक सट खेर फाल्दा ब्याक नाइन २–अन्डर ३३ मा सकाए । योसँगै उनी संयुक्त रूपमा पाँचौँबाट दोस्रो स्थानमा उक्लन सफल भए ।

लगातार दुई दिन दोस्रो स्थानमा रहेका भुवनले फ्रन्ट नाइन ५–ओभर ३९ र ब्याक नाइन २–ओभर ३७ मा सकाए । उनले दोस्रो र चौथो तथा यसपछि पाँचौँदेखि सातौँ होलमा लगातार तीन बोगी हाने । ११औँ र १५औँ होलमा पनि एक–एक सट खेर फाले ।

प्रतियोगिताका विजयी खेलाडीहरूलाई सूर्य नेपाल प्रालिका महाप्रबन्धक केशव प्रधान, गण्डकी प्रदेश गल्फ संघका अध्यक्ष इन्द्रधारा बिष्ट, कास्की जिल्ला गल्फ संघका अध्यक्ष जिवाराम गुरुङले पुरस्कार वितरण गरे ।

५४ होलको तीनदिने प्रतियोगितामा ३४ प्रोफेसनल र १८ एमेच्योर गरी कुल ५२ गल्फरले भाग लिएका थिए ।