काठमाडौं । राष्ट्रिय प्रजातन्त्र पार्टी (राप्रपा)ले सरकारविरुद्धको संघर्षलाई सशक्त बनाउने भएको छ । शुक्रबारदेखि काठमाडौंमा सुरु राप्रपा केन्द्रीय कार्यसमितिको बैठकका क्रममा अध्यक्ष राजेन्द्र लिङदेनले विभिन्न माग राख्दै पार्टीले गरिरहेको आन्दोलन र संघर्षलाई ठोस स्वरूप दिएर सशक्त बनाइने बताए । 

सरकारको कार्यशैलीको समीक्षा, पार्टीका अबको रणनीति, प्रतिपक्षको भूमिका र सहकार्यलगायत विषयमा बैठकमा छलफल गरिने उनले जानकारी दिए ।

नेपाली कांग्रेस र नेकपा (एमाले)जस्ता ठूला दल मिलेर बनाइएको सरकारले जनतामा आशा जागृत गर्न नसकेको, निराशा पैदा भएको र अर्थतन्त्र समेत शिथिल हुँदै गएको लिङदेनले बताए ।

सरकारले प्रजातन्त्रलाई समेत कमजोर बनाउने गरी संसद्लाई छलेर अध्यादेशमार्फत मुलुक सञ्चालन गर्ने परिस्थितिको पनि बैठकमा समीक्षा गरिने उनले उल्लेख गरे ।

पार्टीको जिल्ला अधिवेशनको समीक्षा गर्दै तीव्रता दिन आवश्यक निर्देशन बैठकबाट दिइने राप्रपाले जनाएको छ । बैठक शनिबार सकाउने तयारी छ । हिमालयन टेली भ्वाइस