काठमाडौं । पठन संस्कृतिको विकासका काम गर्दै आएको बुकाहोलिक्सले मासिक चकटी बहसमा रंगकर्मी तथा उपन्यासकार टंक चौलागाईंको उपन्यास ‘रूदाने’माथि परिचर्चा गराएको छ ।

शुक्रबार मार्टिन चौतारीको सभाकक्षमा आयोजित ९७औँ चकटी बहस कार्यक्रममा मूल वक्ता कथाकार विना थिङले कृतिमाथि पाठकीय टिप्पणी राख्दै किम्बदन्तीजस्ता पात्र रूपचन्द्र विष्टमाथि उपन्यास लेखिनु आफैँमा चुनौतीपूर्ण काम भएको बताइन् । तथापि, रूदानेलाई बुझ्न यो उपन्यासले मद्दत गर्ने र कृति पठनीय भएको उनको तर्क रह्यो ।

मकवानपुरमै जीवनको लामो समय बिताएकी थिङले आफ्ना माता पिताले रूपचन्द्र विष्ट (रूदाने)का कतिपय प्रसंग सुनाउने गरेको चर्चा गर्दै उनी स्वाभिमानी मात्र नभएर सहयोगी पनि भएको बताइन् ।

उपन्यासको चर्चा गर्दै कथाकार थिङले व्यक्तिको जीवनमा आधारित उपन्यास लेख्दा लेखकलाई धेरै उडान गर्ने स्वतन्त्रता नहुने बताउँदै किताबका कमि कमजोरी पनि केलाइन् । उनले रूदाने पत्नीका प्रसंग उपन्यासमा कम आएको उल्लेख गरिन् ।

कार्यक्रममा उपस्थित केही पाठकहरूले उपन्यास हतारमा लेखिएको हो कि ! भन्ने चर्चा गर्दै भाषाका कमी कमजोरीबारे कुरा उठाए ।

उठेका सवालहरूको जवाफ दिँदै उपन्यासकार चौलागाईंले रूदानेलाई आफूले नचिने पनि उनका विषयमा उपन्यास लेख्न मन बनाएर खोजी गरेर लेखेको उल्लेख गरे ।

बुकाहोलिक्सकी संयोजक सगुना शाहले चकटी बहसको अब आउन लागेको १००औँ शृङ्खला केही पृथक रूपमा गर्ने सोच रहेको बताइन् ।