काठमाडौं । केही समययता जितु नेपाल चलचित्रको अभिनयमा व्यस्त छन् । दीपकराज गिरी र दीपाश्री निरौलाको टिममा रहेर केही चलचित्रमा काम गरेका जितु यो समूहबाट बाहिरिएपछि पनि चलचित्रमा निरन्तर काम गरिरहेका छन् । 

‘छक्का पञ्जा’ समूहबाट बाहिरिएपछि उनले सिनेमाको मुख्य भूमिकामा रहेर नै काम गर्ने मौका पाए । ‘ह्यारिकी प्यारी’मा उनले पहिलोपटक सोलो लिडको अवसर पाए । यो अवसर पाउँदा उनी हिरोको रुपमा दरिए । 

त्यसपछि जितु मुख्य भूमिकामा रहेको चलचित्र थियो, ‘ज्वाइँ साब’ । यो चलचित्र गएको दसैँमा रिलिज भएको थियो । यो चलचित्रमा पनि उनी हिरोको रूपमा थिए । यो उनको दोस्रो सोलो लिड थियो । 

अहिले हलमा रहेको चलचित्र ‘कार्साङ’मा पनि जितुको अभिनय छ । यसमा भने जितु सहायक भूमिकामा छन् । यो चलचित्रको नायक दयाहाङ राई हुन् । 

दयाहाङले समय दिन नसकेपछि यो चलचित्रको प्रचारमा सहायक भूमिकामा रहे पनि जितु नै दौडिरहेका छन् । नायिकाको भूमिकामा रहेकी सिर्जना निङ्लेखु, जितु र दीया मास्के ‘कार्साङ’को प्रचारमा छन् । 

यो चलचित्रले पनि खासै धेरै दर्शकको माया पाउन सकेन । चलचित्रका धेरै शो खालीखाली छन् । त्यसैले यसले प्रदर्शनको एक सातामा उलेख्य कलेक्सन गर्न सकेको छैन । डेढ करोड हाराहारीमा मात्रै कलेक्सन गरेको छ । 

जितुको पहिलो सोलो लिड रहेको चलचित्र ‘ह्यारी कि प्यारी’ पनि व्यापारिक रूपमा सफल चलचित्र होइन । राम्रो हाइप बनाए पनि यसले बक्सअफिसमा राम्रो कलेक्सन गर्न सकेन । 

दसैँमा ‘छक्का पञ्जा–५’ र ‘१२ गाउँ’सँगै रिलिजमा आएपछि राम्रो हाइप  बनाएको ‘ज्वाइँ साब’ले पनि हाइप अनुसारको कलेक्सन गर्न सकेन । तर, यसले लगानी भने सुरक्षित गरेको थियो । 

त्यसैले जितुले लिड गरेको दुई चलचित्रमध्ये एउटाले लगानी सुरक्षित गर्दा एउटा घाटामा गयो । जितुले अभिनयमा तारिफ बटुलिरहेका छन् । 

अब जितु आफ्नै लगानी र निर्देशनमा चलचित्र निर्माणको तयारीमा छन् ।