काठमाडौं । देशभर आज मौसम सामान्यतया सफा रहनेछ । 

जल तथा मौसम विज्ञान विभागका अनुसार आज बिहान पहाडी भू–भागमा आंशिक बदली रहेको छ । बाँकी भू–भागमा मौसम मुख्यतया सफा छ ।

तराईका केही भू–भागमा हुस्सु र कुहिरो लागेको छ । हुस्सु र कुहिरो लागेकाले दैनिक जनजीवन, स्वास्थ्य, यातायात, पर्यटन तथा हवाई उडानमा असर पर्नसक्ने विभागले जनाएको छ । 

केही प्रदेशका हिमाली क्षेत्रमा आंशिक बदली रहे पनि मौसम सफा रहने विभागले जनाएको छ । 

हाल देशमा पश्चिमी न्यूनचापीय प्रणालीको आंशिक प्रभाव रहेको छ ।

आज बिहान काठमाडौंको न्यूनतम तापक्रम ४.८ डिग्री सेल्सियस रहेको छ । मौसमविद् सञ्जिव अधिकारीका अनुसार दिउँसो काठमाडौंको तापक्रम बढेर १७ देखि १९ डिग्री सेल्सियससम्म पुग्नेछ । 

यसैबीच, चिसो बढेसँगै तराईका जिल्लामा हुस्सु र कुहिरो लाग्नेक्रम बढेको छ । तराईका केही स्थानमा आज बिहान बाक्लो हुस्सु र कुहिरो लागेको छ । 

• मंगलबारबाट पुनः हुस्सु र कुहिरो बढ्ने, यी दुईमा के छ फरक ?

आज बिहान सबैभन्दा धेरै कुहिरो भैरहवामा लागेको छ । भैरहवामा ५० मिटर भिजिविलिटी रहेको छ । विराटनगरमा सय मिटर भिजिविलिटी छ । सिमरामा दुई सय मिटर भिजिविलिटी रहेको मौसमविद् अधिकारीले जानकारी दिए । 

“बाक्लो कुहिरो लागे पनि यो दिनभर लाग्दैन । मध्याह्नसम्म हट्नेछ,” उनले भने । 

दुई हजारभन्दा कम भिजिविलिटीमा विमान उडान तथा अवतरण गर्न सहज हुँदैन । 

एक किलोमिटरभन्दा कम भिजिविलिटी भयो भने कुहिरो र एक किलोमिटरभन्दा बढी र पाँच किलोमिटरभन्दा कम भिजिविलिटी भयो भने त्यो हुस्सु हो ।