काठमाडौं । नेकपा (एमाले)ले नेता भीम रावलले सार्वजनिक गरेको ३१ पृष्ठको प्रश्न र आरोपलाई तत्कालीन नेकपाका अध्यक्ष पुष्पकमल दाहाल ‘प्रचण्ड’कै दस्तावेजको कपी पेस्टको संज्ञा दिएको छ । बिहीबार बसेको एमाले सचिवालय बैठकपछि उपमहासचिव प्रदीप ज्ञवालीले रावलले पत्रकार सम्मेलन गरेर सार्वजनिक गरेको दस्तावेज सोही प्रकृतिको भएको टिप्पणी गरेका हुन् ।

“२०७७ साल कार्तिकमा लगभग यिनै भाषामा प्रचण्डले तत्कालीन नेकपा अध्यक्ष केपी शर्मा ओलीलाई यस्तै खालको टिप्पणी गर्नुभएको थियो,” ज्ञवालीले भने, “सायद १९ पेजको थियो । एक हिसाबले कपी पेस्टजस्तै हो ।”

उनले गालीगलौजले देश नबन्ने पनि बताए । “एक जमाना थियो, बाबुराम भट्टराईजी, प्रचण्डजी पुराना दललाई डिक्सनरीमा भएका शब्द खोजीखोजी गाली गर्नुहुन्थ्यो,” ज्ञवालीले भने, “रवि लामिछानेजी पनि गालीगलौजबाटै उदाएको हो । गालीगलौजले देश बन्दैन ।”

साढे ३० पृष्ठको गालीगलौज र आधा पृष्ठ मात्र योजना रहेकाले रावलमा कति नकारात्मकता रहेछ भन्ने प्रस्ट भएको उनले बताए । रावलको अभिव्यक्ति अपेक्षित नै भएको उनले उल्लेख गरे । एमाले गालीगलौजको प्रतिस्पर्धामा नरहेको उनको भनाइ छ ।

संगठित सदस्यता खोसिएपछि रावलले बुधबार (हिजो) एमालेका अध्यक्ष एवं प्रधानमन्त्री केपी शर्मा ओलीमाथि ७४ प्रश्न र आरोप लगाएका थिए ।

यही पुस २१ र २२ गते बस्ने केन्द्रीय कमिटी बैठकका निम्ति अध्यक्षले तयार गरेको राजनीतिक प्रतिवेदनका मुख्य बुँदामाथि बिहीबार छलफल गरिएको थियो । सोही प्रतिवेदन केन्द्रीय कमिटी बैठकमा प्रस्तुत गर्ने निर्णय गरिएको छ । नेपाली कांग्रेस र एमालेबीचको सरकार गठनको औचित्य, आवश्यकताको विश्लेषण प्रतिवेदनमा गरिएको ज्ञवालीले बताए ।