काठमाडौं । काठमाडौंको कागेश्वरी मनोहरा नगरपालिकास्थित मूलपानीमा भएको गोली प्रहार घटनामा पारिवारिक रिसइबी नै मुख्य कारण रहेको खुलेको छ । शनिबार राति १० बजेतिर खोटाङका साहिर शंकरले मूलपानीका अर्जुन श्रेष्ठको घरमा गोली चलाएका थिए ।

गोली प्रहारबाट अर्जुन र उनकी श्रीमती घाइते भएका छन् । स्थानीयले प्रतिकार गर्दा साहिरसमेत घाइते भएका छन् ।

उनीहरूको ट्रमा सेन्टरमा उपचार भइरहेको काठमाडौं प्रहरीको एसपी नवराज अधिकारीले जानकारी दिए ।

अर्जुन श्रेष्ठका परिवारले भने ती युवक चोरी गर्ने उद्देश्यले घरमा आएको भन्दै हल्ला गरेपछि स्थानीयले कुटपिट गरेका थिए ।

तीनजना नै घाइते भएका कारण थप अनुसन्धान जारी रहेको प्रहरीले जनाएको छ ।