नयाँदिल्ली । भारत सरकारले पूर्वप्रधानमन्त्री मनमोहन सिंहको निधनमा सात दिनसम्म राष्ट्रिय शोकको घोषणा गरेको छ ।

समाचार एजेन्सी एएनआईका अनुसार २७ डिसेम्बरका सबै सरकारी कार्यक्रमहरू रद्द गरिएको छ । मनमोहन सिंहको राजकीय सम्मानका साथ अन्तिम संस्कार गरिने जनाइएको छ ।

शनिबार अन्त्येष्टिको दिन विदेशमा रहेका भारतीय दूतावास र उच्चायोगमा पनि राष्ट्रिय झण्डा झुकाइनेछ ।

केरला सरकारले पनि डिसेम्बर २६ देखि जनवरी १ सम्म राज्यमा सातदिन राजकीय शोकको घोषणा गरेको छ । प्रदेश सरकारले सबै जिल्ला अधिकारीलाई राष्ट्रिय झण्डा झुकाउन निर्देशन दिएको छ ।

कर्नाटक सरकारले पनि डिसेम्बर २७ मा सातदिन राजकीय शोक र सार्वजनिक बिदाको घोषणा गरेको छ ।

उनको निधनमा भारतका प्रधानमन्त्री, राष्ट्रपति, विपक्षी दलका नेतालगायत धेरै नेताहरूले शोक व्यक्त गरेका छन् । शनिबार अन्तिम संस्कार गरिने छ ।