काठमाडौं । नेपाल ग्रामीण चलचित्र महोत्सवको चौथो संस्करणका लागि चलचित्र दर्ता खुला गरिएको छ । आउँदो वर्षको वैशाखमा आयोजना हुने महोत्सवका लागि डकुमेन्ट्री, सर्ट फिल्म, फिचर फिल्म र भाषाभाषीका चलचित्र दर्ताका लागि आह्वान गरिएको हो । 

सेलिब्रेटी नेपालको आयोजनामा हुने महोत्सवको उद्देश्य ग्रामीण बजारमा नेपाली चलचित्र पुर्याउँदै पर्यटन प्रवर्द्धन गर्नु रहेको महोत्सवका अध्यक्ष रघुनाथ सापकोटाले जानकारी दिएका छन् ।

‘आफ्नै गाउँ, आफ्नै ठाउँ, आफ्नै भाषा, आफ्नै चलचित्र’ भन्ने नाराका साथ आयोजना हुने महोत्सवमा गाउँले परिवेशमा निर्माण भएका स्वदेशी चलचित्रहरूलाई प्रोत्साहन गरिनेछ । जुरी टिमले छनोट गरेका चलचित्रहरू स्क्रिनिङ गरिने र उत्कृष्ट चलचित्रलाई अवार्ड प्रदान गरिने योजना रहेको उनको भनाइ छ ।

महोत्सवमा चलचित्र प्रदर्शनसँगै ग्रामीण परिवेशलाई समेटेर निर्माण गरिएका चलचित्रको महत्व, दर्शकको चाहना र ग्रामीण फिल्म क्षेत्रको सम्भावना सम्बन्धी अन्तरक्रिया तथा कार्यशाला गोष्ठीहरू आयोजना गरिनेछ ।

पहिलो संस्करण गोरखाको लाप्राकमा, दोस्रो संस्करण काभ्रेको भकुण्डेबेसीमा र तेस्रो संस्करण रामेछापमा सम्पन्न भएको थियो । चौथो संस्करण रसुवामा हुनेछ ।