काठमाडौं । चलचित्र ‘रंगी’ फागुन २ गते प्रदर्शन हुने भएको छ । निर्माण टिमले पोस्टर र मोसन पोस्टर बुधबार सार्वजनिक गर्दै रिलिज मितिबारे जानकारी दिएको हो ।

पोस्टरमा कलाकार सलोन बस्नेत र बाल कलाकार आयुषी ढकाल छन् । ग्रामीण बजारलाई पृष्ठभूमिमा राखेर तयार पारिएको पोस्टरमा आयुषी र सलोनलाई गम्भीर भावमा देखिन्छन् । 

मोसन पोस्टरमा सलोन, आयुषीसँगै ‘डेब्यु’ नायिका नम्रता श्रेष्ठलाई देख्न सकिन्छ । नम्रता ‘मिस वर्ल्ड नेपाल २०२०’की विजेता हुन् ।

सुरेश न्यौपानेको निर्देशन रहेको चलचित्रमा सलोन बस्नेत, नम्रता श्रेष्ठ, दिलीप रायमाझी, आयुषी ढकाल, उत्तम केसी, सुमिन गुरुङ र विशाल पहारीको अभिनय छ । यो चलचित्रले बाबुछोरीको कथा भन्नेछ । 

चलचित्र ‘रंगी’ सलोनको डेब्यु निर्माण हो । सक्षम सुवेदी र करिष्मा केसी बस्नेतको निर्माण रहेको चलचित्रमा सुमन गजमेरको लेखन, सौरभ लामाको छायांकन छ ।