काठमाडौं । दक्षिण भारतीय अभिनेता अल्लु अर्जुनलाई अन्तरिम जमानत मिलेको छ । तेलंगाना उच्च अदालतले अल्लु अर्जुनलाई चार हप्ताको लागि अन्तरिम जमानत दिएको इन्डिया टुडेले जनाएको छ ।  

यसअघि, उनलाई तेलंगनाको स्थानीय अदालतले १४ दिन न्यायिक हिरासतमा पठाउन आदेश दिएको थियो ।  

डिसेम्बर ४ मा सन्ध्या थिएटरमा पुष्पा–२ को प्रोमोसनका लागि जाँदा भागदौड हुँदा २५ वर्षीया महिलाको मृत्यु भएको थियो । मृतक महिलाका छोरा घाइते भएका थिए । उनको उपचार भइरहेको छ ।

सोही घटनाको अनुसन्धानका लागि अल्लु अर्जुनलाई उनकै निवासबाट प्रहरीले आज पक्राउ गरेको थियो ।

भीड व्यवस्थापन गर्न कुनै सुरक्षा योजना नबनाएको सिनेमा हल व्यवस्थापक र अल्लु अर्जुनलाई आरोप लागेको छ ।