काठमाडौं । विश्वव्यापी रूपमा मान्यताप्राप्त कुमोन शिक्षा कार्यक्रम नेपालमा आधिकारिक रूपमा कार्यान्वयनमा आएको छ । आज बुधबार आयोजित सम्मेलनमा विभिन्न शिक्षाविद्, विद्यालयका शिक्षक र सरोकारवालाबीच सो कार्यक्रम कार्यान्वयनको घोषणा गरिएको हो । 

सन् १९५८ मा जापानको ओसाकाबाट थालनी भएको यो कार्यक्रमले विद्यार्थीको मानसिक विकास, ‘आइक्यु’को स्तर वृद्धिसँगै आलोचनात्मक सोच र समस्या समाधान क्षमताको विकासमा योगदान पुग्ने बताइएको छ ।

विभिन्न ४० भन्दा बढी विद्यालयका प्रधानाध्यापकको सहभागिता रहेको कार्यक्रममा जापानस्थित एनपिओ कलरबाथका अध्यक्ष योसिकावा युसुकेले शिक्षामा नवप्रवर्तनशील विधिहरूको महत्त्वमा जोड दिए । 

जापानस्थित कुमोन मुख्यालयकी प्रतिनिधि मित्सुको सिमाजोइले कुमोन कार्यक्रमको विश्वव्यापी प्रभाव रहेको जनाउँदै विश्वका १० प्रतिशत विद्यार्थी (करिब ४० लाख)ले कुमोन विधि प्रयोग गरिरहेको बताइन् । यो कार्यक्रम विश्वका ६५ देशका २३ हजार सात सय केन्द्रमा सञ्चालित छन् ।