काठमाडौं । साहित्यिक पत्रकार संघले एक कार्यक्रमको आयोजना गरी दुई सर्जकलाई सम्मानित गरेको छ । मंगलबार अनामनगरमा आयोजित कार्यक्रममा संघले ‘साहित्यिक पत्रकार संघ स्वर्ण महोत्सव सम्मान, २०८०’ साहित्यकार मोहन सिटौलालाई तथा ‘व्यथित काव्य डायस्पोरा सम्मान, २०८१’ कवि सुरेन उप्रेतीलाई प्रदान गरेको छ । कार्यक्रमका प्रमुख अतिथि प्रा.डा. सुरेन्द्र केसी लगायतले उक्त सम्मान प्रदान गरे ।

संघका अध्यक्ष राधेश्याम लेकालीले संघ २०२९ सालमा स्थापना भएको जानकारी दिँदै यस संस्थाले २०३७ सालमा साहित्यकार बीपी कोइरालालाई समेत सम्मान गरेको स्मरण गरे ।

लेकालीले संघले विभिन्न पुरस्कार तथा सम्मानको स्थापना गरेको पनि जानकारी दिँदै अमेरिका बस्ने सिटौला र क्यानडा बस्ने उप्रेती नेपाल आएको मौका पारेर उक्त सम्मान प्रदान गरिएको बताए ।

कार्यक्रममा प्रमुख अतिथि प्रा.डा. केसी, प्राज्ञ बाबा बस्नेत सहित सम्मानित व्यक्तिहरूले बोलेका थिए ।