काठमाडौं । मुख्यसचिव एकनारायण अर्यालले कर्मचारीतन्त्र खेलौनाजस्तो भएको गुनासो गरेका छन् । प्रतिनिधिसभाअन्तर्गतको राज्यव्यवस्था तथा सुशासन समितिको आइतबारको बैठकमा उनले संघीय निजामती सेवा विधेयक पारित नहुँदा समस्या भएको बताएका हुन् ।

निजामती विधेयकमाथिको छलफलका क्रममा उनले राजनीतिक संघीयता कार्यान्वयन भएको उल्लेख गरे । तर, प्रशासनिक संघीयता कार्यान्वयन हुन नसकेको उनको आरोप छ ।

कर्मचारीको मनोबल उच्च नहुँदा नागरिकलाई सेवा दिन नसकिएको उनले बताए । सोही कारण नागरिक र सरकारबीच दूरी सिर्जना भएको उनको बुझाइ छ ।

कानुन अभावमा २०० कर्मचारीले पेन्सनपट्टा नपाएको उनले सुनाए । उनले भने, “स्थायी संयन्त्र भनिए पनि अस्थायीजस्तै भयो । कानुन अभावमा प्रदेश मन्त्रालयमा कर्मचारी खटाउन सकिएको छैन ।” 

चाँडो विधेयक टुंगो लगाए मात्र संघीयता कार्यान्वयन हुने र कर्मचारीतन्त्र पद्धतिगत ढंगले चल्ने उनले बताए । उनले थपे, “कर्मचारीतन्त्र खेलौनाजस्तो भएको छ, कर्मचारीतन्त्र बलियो नभए कसरी काम हुन्छ ?”

नागरिकले अपेक्षा गरेअनुसार कर्मचारीतन्त्र बनाउन निजामती सेवा विधेयक तत्काल टुंगो लगाउनुपर्ने मुख्यसचिव अर्यालको सुझाव छ ।