काठमाडौं । नेपाल प्रिमिय लिग (एनपीएल)मा विराटनगरको पहिलो जितमा ‘प्लेयर अफ द म्याच’ चुनिएका लोकेश बमले पहिलो इनिङपछि नै आफूमा खेल जिताउँछु भन्ने विश्वास रहेको प्रतिक्रिया दिएका छन् ।

बुधबार कीर्तिपुरस्थित त्रिवि क्रिकेट मैदानमा सम्पन्न खेलमा विराटनगरले लुम्बिनी लायन्सलाई हराउँदा ओपनर लोकेशले ७१ रन बनाएका थिए । लोकेशको उत्कृष्ट प्रदर्शनप्रेरित विराटनगर लुम्बिनीविरुद्ध १९२ रनको कीर्तिमानी लक्ष्य पूरा गरेको थियो । यो प्रतियोगितामा कुनै पनि टिमले पूरा गरेको सबैभन्दा ठूलो लक्ष्य हो ।

जितपछि लोकेशले भने, “एक ओपनरको रूपमा मेरो भूमिका सधैँ टिमलाई राम्रो सुरुआत दिने हुन्छ । पहिलो इनिङपछि म खेल जिताउँछु भन्ने कुरा गरिरहेको थिएँ । त्यो विश्वास राखिराखेको थिएँ । दिमागमा शतक हान्छु भन्ने थिएन, तर खेल जिताउँछु भन्ने थियो । विदेशी खेलाडीहरू यो माहोलमा अभ्यस्त छैनन् । उनीहरूका लागि यो नयाँ हो । हामी सधैँ यही खेलिराखेको छौँ । हामीले स्टेप अप गर्नुपर्छ जस्तो लाग्छ । खेलिरहेको मैदान भएर नेपाली नै खेल जिताउने हुनुपर्छ भन्ने कुरा भइरहेको थियो ।”

तीन खेलमा दुई अंक जोडेको विराटनगर तालिकाको पाँचौँ स्थानमा छ । विराटनगर यसअघि पहिलो खेलमा जनकपुर बोल्ट्ससँग आठ विकेटले र दोस्रो खेलमा ९० रनको हार बेहोरेको थियो ।