काठमाडौं । नेपाल प्रिमियर लिग (एनपीएल)मा विराटनगर किंग्सविरुद्ध लुम्बिनी लायन्सले १९२ रनको कीर्तिमानी लक्ष्य प्रस्तुत गरेको छ । 

बुधबार कीर्तिपुरस्थित त्रिवि क्रिकेट मैदानमा टस हारेर ब्याटिङमा आएको लुम्बिनीले निर्धारित २० ओभरमा सात विकेट गुमाएर १९१ रनको योगफल बनाएको हो । मंसिर १५ गतेदेखि सुरु भएको प्रतियोगितामा कुनै पनि टिमले बनाएको यो अहिलेसम्मकै सबैभन्दा ठूलो योगफल हो ।

लुम्बिनीले सुदूरपश्चिम रोयल्सको नाममा रहेको कीर्तिमान तोडेको हो । यसअघि सुदूरपश्चिम रोयल्सले विराटनगर किंग्सविरुद्ध नै १८२ रन बनाउँदै यो कीर्तिमान बनाएको थियो ।

लुम्बिनीका कप्तान रोहितकुमार पौडेलले ४६ रन बनाए । अर्धशतक बनाउनबाट चार रनले चुकेका रोहितलाई १२.५ ओभरमा राजेश पुलामीले प्रतिश जिसीबाट क्याच गराए । रोहितले २९ बलमा चार चौका र दुई छक्का प्रहार गरे । 

६४–२ को स्थितिबाट रोहितले टम मोरेससँग तेस्रो विकेटका निम्ति ३३ बलमा ६७ रनको आक्रामक साझेदारी गर्दै लुम्बिनीको इनिङ बढाएका थिए । १४औँ ओभरको चौथो बलमा रनआउट हुनुअघि मोरेसले १७ बलमा एक चौका र दुई छक्कासहित ३० रन प्रहार गरे । 

लुम्बिनीको खातामा १२ रन थपेका सन्दीप जोरा १६.२ ओभरमा रनआउट भए । उनले १३ बल खेले पनि बाउन्ड्री प्रहार गर्न भने सकेनन् । साद बिन जफरले १३ बलमा एक छक्कासहित १५ रन बनाए । सन्दीप लामिछानेले गरेको १९औँ ओभरको दोस्रो बलमा जफर मार्टिन गप्टिलबाट क्याच भएका थिए । सोही ओभरको चौथो बलमा बेन कटिङ पनि रनआउट भए । कटिङले ६ बलमा एक चौकासहित ६ रन बनाए । 

त्यसअघि लुम्बिनीले चौथो ओभरको पहिलो बलमा ओपनर आशुतोष घिरैयालाई रनआउटको रुपमा गुमाएको हो । ननस्ट्राइकमा रहेका आशुतोष रन लिन अघि बढेको स्थितिको फाइदा उठाउँदै विराटनगरका निकोलस किर्टोनले उत्कृष्ट ‘थ्रो’ गर्दै रनआउट गरे । आशुतोषले १५ रन बनाए । दोस्रो विकेट लुम्बिनीले आठौँ ओभरको दोस्रो बलमा अर्का ओपनर अर्जुन साउदलाई गुमाएको थियो । साउदलाई विराटनगरका इस्मात आलमले बोल्ड गरे । उनले लुम्बिनीको खातामा १७ रन थपे । अन्तिममा अविजित रहेका विवेक यादवले १९ रन बनाए । आक्रामक रूपमा प्रस्तुत भएका विवेकले सात बलमा तीन छक्का प्रहार गरे । रोमन सिमोन्ड्सले दुई रन बनाए । 

विराटनगरका कप्तान सन्दीप लामिछाने, इस्मात आलम र राजेश पुलामीले समान एक विकेट लिए । प्रतियोगितामा तेस्रो खेल खेलिरहेको विराटनगरबाट सन्दीपको यो पहिलो विकेट हो । यसबाहेक, विराटनगरले लुम्बिनीका चार ब्याटरलाई रनआउट गरेको थियो । प्रतियोगितामा लुम्बिनीको यो पहिलो खेल हो । यस्तै, विराटनगरको भने यो तेस्रो खेल हो । विराटनगर आज पहिलो जितको खोजीमा छ । यसअघि विराटनगर पहिलो खेलमा जनकपुर बोल्ट्ससँग आठ विकेट र दोस्रो खेलमा चितवन राइनोजसँग ८७ रनले पराजित भएको थियो ।