काठमाडौं । अमेरिकी राष्ट्रपति जो बाइडेनले बन्दुक र करसम्बन्धी मुद्दामा दोषी ठहर भएका आफ्ना छोरा हन्टर बाइडेनलाई औपचारिक रूपमा क्षमादान गरेका छन् । अमेरिकी राष्ट्रपतिको कार्यालय ह्वाइट हाउसले आइतबार एक विज्ञप्ति जारी गर्दै बाइडेनले उनका छोरालाई पूर्ण रूपमा र बिनाकुनै सर्त माफी दिएको जनाएको छ ।

राष्ट्रपति बाइडेनले यसअघि बारम्बार आफ्नो छोरालाई माफी दिने एवं सजाय कम गर्ने कार्यका निम्ति कार्यकारी अधिकार प्रयोग नगर्ने बताउँदै आएका थिए । हाल उनले त्यसको ठिकविपरीत माफी दिएका हुन् ।

हन्टर बाइडन गएको सेप्टेम्बरमा करसम्बन्धी मुद्दामा दोषी ठहर भएका थिए । गएको जुनमा उनी अवैध रूपमा बन्दुक किनेको र लागुऔषध प्रयोग गरेको मुद्दामा दोषी ठहर भएका थिए । यसरी विभिन्न अपराधमा दोषी ठहरिने उनी बहालवाला राष्ट्रपतिको पहिलो सन्तान बनेका थिए ।

उनलाई यसै डिसेम्बर १२ मा बन्दुक र त्यसको चार दिनपछि करसम्बन्धी मुद्दामा सजाय सुनाइने तय थियो । उनलाई करसम्बन्धीमा १७ र बन्दुकको मुद्दामा २५ वर्षसम्मको सजाय तोकिन सक्ने थियो । तर, बाइडेनले आफ्नो कार्यकारी अधिकार प्रयोग गर्दै छोरालाई माफी दिएका हुन् ।

नवनिर्वाचित राष्ट्रपति डोनाल्ड ट्रम्पले बाइडेनको यो कदमलाई ‘न्यायको दुरुपयोग र अवहेलना’ भनेका छन् । उनले गत अक्टोबरमै बाइडेनले उनका छोरालाई माफी दिएमा अचम्म मान्न नहुने टिप्पणी गरेका थिए । बाइडेनको यो निर्णयसँगै उनको चर्काे आलोचना भइरहेको छ ।