काठमाडौं । नेपाल मानवअधिकार अन्तर्राष्ट्रिय चलचित्र महोत्सवको ‘लाइनअप’ सार्वजनिक भएको छ । 

बाह्रौँ संस्करणको महोत्सव मंसिर २४ देखि २७ गतेसम्म चल्नेछ । महोत्सवमा नेपालसहित २३ देशका ४७ चलचित्र छनोटमा भएको महोत्सवका निर्देशक पाण्डव खत्रीले जानकारी दिए । 
 
“यसपटकको संस्करणमा अन्तर्राष्ट्रियस्तरमा ख्यातिप्राप्त चलचित्रसमेत सहभागी हुन आएका छन् । मानवअधिकारसँग सम्बन्धित चलचित्रको प्रवर्द्धन र प्रदर्शनका लागि नियमित रूपमा महोत्सव गर्दै आएको छौँ”, निर्देशक खत्रीले भनेका छन् । 

उनले ‘अल वी इमाजिन एज लाइट’, ‘द म्यान हु कुड्नट रिमेन्न साइलेन्स’, ‘एन आउटरन’, ‘अनार दाना’, ‘ओटिट’ गायत चलचित्रको सहभागिताले महोत्सवको रौनकता बढाउने बताएको आयोजकले जारी गरेको प्रेस नोटमा उल्लेख छ । 
 
मानवअधिकार चलचित्र केन्द्रको आयोजनामा हुन लागेको महोत्सवमा मानवअधिकार पैरवीका लागि विभिन्न अन्तरक्रिया तथा गोष्ठी सञ्चालन हुने बताइएको छ । 

महोत्सव काठमाडौंस्थित चलचित्र विकास बोर्ड र नेपाल पर्यटन बोर्डको सभाहलमा सञ्चालन हुनेछ ।