काठमाडौं । आउँदो मंसिर १६ गते हुने स्थानीय तह उपनिर्वाचनको सरगर्मी बढेको छ । दलहरू आफ्नो पक्षमा माहोल बनाउन गृहकार्यमा छन् ।

०७९ को निर्वाचनपछि रिक्त स्थानीय तहका ४२ स्थान (जिल्ला समन्वय समितिबाहेक)मा उपनिर्वाचन हुँदै छ । दलहरू उमेदवार छान्न लागिपरेका छन् । उपनिर्वाचनमा दलहरूको शक्ति परीक्षण हुनेछ । प्रमुख दलहरू एक्लाएक्लै चुनाव लड्ने तयारीमा देखिएका छन् ।

एक नगरपालिका प्रमुख, एक उपप्रमुख, दुई गाउँपालिका अध्यक्ष, चार उपाध्यक्ष र विभिन्न स्थानीय तहका रिक्त वडाध्यक्ष पदका निम्ति उपनिर्वाचन हुन लागेको हो । स्थानीय तहका प्रमुख, उपप्रमुख, अध्यक्ष र उपाध्यक्षमा रिक्त अधिकांश पद यसअघि नेपाली कांग्रेसले जितेको थियो ।

रिक्तमध्ये एक नगरप्रमुख, एक उपप्रमुख, दुई गाउँपालिका अध्यक्ष, दुई उपाध्यक्षमा कांग्रेसबाट जनप्रतिनिधि निर्वाचित भएका थिए । नेकपा (माओवादी केन्द्र)बाट निर्वाचित जनप्रतिनिधि रहेका दुई गाउँपालिका उपाध्यक्ष पद रिक्त छ । यी अधिकांश स्थानमा जनप्रतिनिधिको निधन भएपछि पद रिक्त भएका हुन् ।

उपनिर्वाचन हुन लागेका स्थानमा कसले कति मत पाएका थिए ? 
मंसिर १६ गते उपनिर्वाचन हुन लागेका स्थानमध्ये एक हो, काठमाडौंको कीर्तिपुर नगरपालिका । कीर्तिपुर नगरपालिकाको प्रमुख र कीर्तिपुर–१ र ४ मा रिक्त वडाध्यक्ष पदका निम्ति उपनिर्वाचन हुन लागेको हो ।

कांग्रेसबाट नगरप्रमुख जितेका राजकुमार नकर्मीको निधनपछि उक्त पद रिक्त छ । ०८१ साउन १० गते उनको निधन भएको थियो । मिर्गौलासम्बन्धी रोगबाट पीडित नकर्मीको उपचारका कममा निधन भएको हो ।

०७९ को स्थानीय तह निर्वाचनमा उनले नौ हजार ४३ मत प्राप्त गरेका थिए । उनका निकटतम प्रतिस्पर्धी नेकपा (एमाले)का उमेदवार केशरत्न बज्राचार्यले पाँच हजार ५०७ मत पाएका थिए । उनीहरूबीचको मतान्तर तीन हजार ५३६ थियो ।

त्यहाँ माओवादी केन्द्रका शिवशरण महर्जनले चार हजार ९०, नेकपा (एकीकृत समाजवादी)का बटुकृष्ण थापाले एक हजार १५३ मत ल्याएका थिए । राष्ट्रिय प्रजातन्त्र पार्टी (राप्रपा)का जितबहादुर बिष्टले ५७२, नेपाल मजदुर किसान पार्टी (नेमकिपा)का श्रीकृष्ण महर्जनले ५३२, स्वतन्त्र उमेदवार मनोज बुढाथोकीले ३६५, नेपाली कांग्रेस (बीपी)का प्रविद् खनालले ८१ मत प्राप्त गरेका थिए ।

यस्तै, आमूल परिवर्तन मसिहा पार्टीका श्यामकाजी महर्जनले २१, स्वतन्त्र उमेदवार भीमकुमार महर्जनले १३ मत ल्याएका थिए ।

ग्रामथान गाउँपालिका
मोरङको ग्रामथान गाउँपालिकाका अध्यक्षका निम्ति पनि उपनिर्वाचन हुँदै छ । पालिका अध्यक्ष जयप्रकाश गच्छदारको निधनपश्चात् उक्त पद रिक्त छ । ०८१ असार ३ गते उनको निधन भएको थियो ।

स्थानीय तह निर्वाचनमा कांग्रेसका गच्छदार निर्वाचित भएका थिए । उनले सात हजार ६०५ मत प्राप्त गरेका थिए । उनका निकटतम प्रतिस्पर्धी एमालेका शिवनारायण माझी थारुले ६ हजार ९३ मत ल्याएका थिए । उनीहरूबीचको मतान्तर एक हजार ५१२ थियो ।

त्यहाँ माओवादी केन्द्रका विजयकुमार सरदारले दुई हजार ७२७, राप्रपाका पखुलाल विश्वासले ४४७, एकीकृत समाजवादीका राकेश चौधरीले १३९ मत पाएका थिए ।

यस्तै, जनमत पार्टीका उमेदवार पञ्चनारायण चौधरी थारुले ९८, नेपाल नेमकिपाका मनोजकुमार चौधरीले चार मत प्राप्त गरेका थिए ।

महाबु गाउँपालिका
दैलेखको महाबु गाउँपालिकाका अध्यक्ष लछुमन गुरुङको पनि उपचारका क्रममा निधन भएको थियो । ०७९ माघ २७ गते उनको निधन भएको भयो । उनी कांग्रेसका तर्फबाट निर्वाचित भएका थिए ।

एमालेका हरिप्रसाद उपाध्यायलाई पराजित गर्दै गुरुङ पालिका अध्यक्ष बनेका थिए । गुरुङ ४६० मतान्तरले निर्वाचित भएका थिए । उनले दुई हजार ९७९ र उपाध्यायले दुई हजार ५१९ मत पाएका थिए ।

यस्तै, एकीकृत समाजवादीका जंगबहादुर शाहीले दुई हजार २६८, नेमकिपाका बमबहादुर सिंहले ५८, स्वतन्त्र उमेदवार विष्णुकुमार बुढाले २२ मत ल्याएका थिए । राप्रपाका राजबहादुर सिंहले १५ र अर्का स्वतन्त्र दिनेशबहादुर सिंहले एक मत ल्याएका थिए । 

नलगाड नगरपालिका
भूकम्पमा परी जाजरकोटको नलगाड नगरपालिकाकी उपप्रमुख सरिता सिंहको मृत्यु भयो । ०८० कात्तिक १७ गतेको भूकम्पमा उनको निधन भएपछि पद रिक्त छ ।

कांग्रेसका तर्फबाट निर्वाचित सिंहले पाँच हजार ४०६ मत ल्याएकी थिइन् । निकटम प्रतिस्पर्धी एमालेकी सुनिता बोहराले तीन हजार ३९३ मत पाएकी थिइन् ।

त्यहाँ स्वतन्त्र उमेदवार सुशीलाकुमारी शाहीले ९४, राप्रपाकी डम्बरकुमार बानियाँले ४८ मत ल्याएकी थिइन् ।

गौरीशंकर गाउँपालिका
दोलखाको गौरीशंकर गाउँपालिकाको उपाध्यक्ष पदका निम्ति पनि उपनिर्वाचन हुँदै छ । कांग्रेसका तर्फबाट पालिका उपाध्यक्षमा निर्वाचित श्यामसुन्दर तामाङको निधनपश्चात् पद रिक्त छ । ०८० असार ३१ गते हृदयाघातका कारण उनको निधन भएको थियो ।

कांग्रेस–माओवादी गठबन्धनबाट निर्वाचित तामाङले चार हजार ७४१ मत ल्याएका थिए । निकटतम प्रतिस्पर्धी एमालेकी मुना शिवाकोटीले तीन हजार २८१ मत ल्याएकी थिइन् । राप्रपाकी यशोदा पाठकले २४ मत पाएकी थिइन् ।

सर्केगाड गाउँपालिका
हुम्लाको सर्केगाड गाउँपालिकाको उपाध्यक्ष पद पनि रिक्त छ । माओवादीका तर्फबाट उपाध्यक्षमा निर्वाचित चन्द्रसिंह कार्कीको निधनपश्चात् पद रिक्त भएको हो । ०८१ भदौ ४ गते सवारी दुर्घटनामा परी उनको निधन भएको थियो ।

स्थानीय तह निर्वाचनमा उक्त पालिकामा कांग्रेस–माओवादी गठबन्धन थियो । कार्कीले तीन हजार २६९ मत ल्याएका थिए । एमालेकी जुनकुमारी फडेरा एक हजार ६४ मत ल्याएर पराजित भएकी थिइन् ।

वामीकार्तिक खापर गाउँपालिका
बाजुराको स्वामीकार्तिक खापर गाउँपालिकाको उपाध्यक्ष पद पनि रिक्त छ । कांग्रेसका तर्फबाट उपाध्यक्षमा निर्वाचित मैना जोशीको निधनपश्चात् पद रिक्त भएको हो । ०८० माघ ४ गते उनको निधन भएको थियो । उनले एमालेकी सुलोचनाकुमारी भण्डारीलाई पराजित गरकी थिइन् ।

जोशीले एक हजार ८१० मत प्राप्त गरेकी थिइन् । भण्डारीले एक हजार ६३७ मत ल्याएकी थिइन् । उनीहरूबीचको मतान्तर १७३ थियो । त्यहाँ माओवादीका सुरेशबहादुर रोकायाले एक हजार २१३ र स्वतन्त्र उमेदवार वीरसिंगे विकले ४१ मत पाएका थिए ।

पुथाउत्तरगंगा गाउँपालिका
रुकुम पूर्वको पुथाउत्तरगंगा गाउँपालिकाको उपाध्यक्ष पदका निम्ति पनि उपनिर्वाचन हुँदै छ । स्थानीय तह निर्वाचनमा माओवादीका तर्फबाट निर्वाचित उपाध्यक्ष भूपेन्द्रा बुढामगरको निधनपश्चात् पद रिक्त छ । गएको भदौ २८ गते सवारी दुर्घटनामा परी उनको निधन भएको थियो ।

०७९ को निर्वाचन जितेर उपाध्यक्ष बनेकी बुढाले चार हजार ५९ मत ल्याएकी थिइन् । निकटतम प्रतिस्पर्धी कांग्रेसकी कमलाकुमारी मल्लले दुई हजार १०, एमालेकी धर्मघर्ती बुढाले एक हजार ८१२ मत पाएकी थिइन् ।

मंसिर १६ गते ३४ वडाध्यक्ष पदका निम्ति समेत उपनिर्वाचन हुँदै छ । तीमध्ये काठमाडौं महानगरपालिका–१६ पनि एक हो । काठमाडौं–१६ कांग्रेसले जितेको थियो । वडाध्यक्षमा निर्वाचित मुकुन्द रिजालको निधनपश्चात् पद रिक्त छ । ०८० भदौ २१ गते उनको निधन भएको थियो ।

रिजालले चार हजार १९ मत पाएका थिए । निकटतम प्रतिस्पर्धी एमालेका लक्ष्मीरत्न तुलाधरले तीन हजार ३१० मत ल्याएका थिए ।

यस्तै, एकीकृत समाजवादीका लक्ष्मण गमालले एक हजार ५८९, राप्रपाकी विन्दिका गुरुङले ५५७ मत पाएका थिए । स्वतन्त्र उमेदवार शान्जे गुरुङले ३२२, अर्जुन थापा क्षेत्रीले २१६, नेमकिपाका श्रीराम महर्जनले ३२, अर्का स्वतन्त्र वसन्तराज भेटुवालले १९ र स्वतन्त्र रामशरण पौडेलले ६ मत प्राप्त गरेको निर्वाचन आयोगको तथ्यांक छ ।